ओखलढुङ्गामा मनसुनजन्य विपद् प्रतिकार्य अभ्यास सञ्चालन

ओखलढुङ्गा, जेठ ८ गते । नेपाली सेना को श्री दुर्गाबक्स गणले मनसुनजन्य विपद् प्रतिकार्य लक्षित अभ्यास “मनसुन–२०८३” सञ्चालन गरेको छ । सिद्धिचरण नगरपालिका–११ सोब्रुमा बिहीबार आयोजित अभ्यासमा भीरबाट लडेर घाइते भएका व्यक्तिको उद्धार, पहिरोमा फसेकाको खोज तथा उद्धार लगायतका गतिविधिको प्रदर्शन गरिएको थियो ।

अभ्यासका क्रममा डोरी, क्याराबिना तथा पुल्लीको प्रयोग गरी ‘टेन्डम रेस्क्यु’ र ‘हाइल्याण्डर रेस्क्यु’ विधिबाट कठिन भूभागमा उद्धार गर्ने तरिका प्रदर्शन गरिएको गणले जनाएको छ । साथै, पहिरोमा बगाएका घर तथा बेपत्ता व्यक्तिको खोजीका लागि ‘सर्च एन्ड रेस्क्यु’ ड्रिलसमेत प्रस्तुत गरिएको थियो । कार्यक्रममा मनसुनजन्य विपद्मा प्रयोग हुने सामग्रीको प्रदर्शनी गर्नुका साथै पोर्टेबल दमकलको प्रयोग विधि र उपयोगिताबारे जानकारी गराइएको थियो ।

अभ्यासमा नेपाल प्रहरी, सशस्त्र प्रहरी बल नेपाल, जिल्ला रेडक्रस, एनसीसी क्याडेट तथा नगर प्रहरीको सहभागिता रहेको थियो । कार्यक्रममा सिद्धिचरण नगरपालिकाका उपमेयर केदारबाबु बस्नेत, निमित्त प्रमुख जिल्ला अधिकारी अरुण सापकोटा, दुर्गाबक्स गणका गणपति सुरेन्द्रकुमार देउजा, विभिन्न सुरक्षा निकायका प्रमुख, जनप्रतिनिधि, सञ्चारकर्मी लगायत करिब १५० जनाको उपस्थिति रहेको थियो ।

मनसुनजन्य विपद् आइपरेमा प्रभावकारी उद्धार तथा खोज कार्य कसरी सञ्चालन गर्ने भन्ने सन्देश दिन अभ्यास आयोजना गरिएको नेपाली सेनाले जनाएको छ । सेनाले प्रत्येक वर्ष मनसुनअघि यस्ता विपद् प्रतिकार्य अभ्यास सञ्चालन गर्दै आएको छ ।