जेठ ८, सोलुखुम्बु । मनसुनजन्य विपद् व्यवस्थापन र उद्धार क्षमताको अभ्यासस्वरूप नेपाली सेनाको श्री दुर्गाबक्स गणले सोलुखुम्बुमा ‘अभ्यास मनसुन–६’ सञ्चालन गरेको छ। सोलुदुधकुण्ड नगरपालिका ७ र ११ को सीमानामा पर्ने साल्मेमा बिहीबार आयोजित अभ्यासमा पहिरो, भीरबाट लड्ने, खोलामा डुब्ने तथा बेपत्ता हुने घटनामा गरिने उद्धार प्रक्रियाको प्रत्यक्ष प्रदर्शन गरिएको थियो।
त्यस्तै, पहिरोमा परेर बगेका घर तथा वेपत्ता भएका व्यक्तिको खोजीका लागि “सर्च एन्ड रेस्क्यु” ड्रिलसमेत प्रदर्शन गरिएको थियो। कार्यक्रममा मनसुनजन्य विपद्मा प्रयोग हुने विभिन्न उपकरणको प्रदर्शनी गर्दै यसका प्रयोगका बारेमा बताइएको थियो ।
प्रदर्शनीमा नेपाली सेनासँगै नेपाल प्रहरी, सशस्त्र प्रहरी बल, जिल्ला रेडक्रस सोसाइटी, एनसीसी क्याडेट तथा नगर प्रहरीको सहभागिता रहेको थियो। मनसुनजन्य विपद्का बेला समन्वयात्मक उद्धार कार्य कसरी सञ्चालन गर्न सकिन्छ भन्ने सन्देश दिन अभ्यास आयोजना गरिएको सेनाले जनाएको छ।
कार्यक्रममा सोलुखुम्का प्रमुख जिल्ला अधिकारी लिला कुमारी के.सी पाण्डे, दुर्गाबक्स गणका गणपति सेनानी अच्युतजंग थापा, ,विभिन्न सुरक्षा निकायका प्रमुखहरु, सोलुदुधकुण्ड नगरपालिकाका प्रमुख प्रशासकीय अधिकृत सुरेन्द्र थापा, जिल्ला रेडक्रस सोसाइटीका कर्मचारी, जनप्रतिनिधिहरु, सञ्चारकर्मी लगायत करिब १२० जनाको उपस्थिति रहेको थियो।
नेपाली सेनाले हरेक वर्ष मनसुनजन्य विपद् प्रतिकार्य लक्षित अभ्यास सञ्चालन गर्दै आएको छ।
Discussion about this post