स्पाइनल इन्जुरी पीडित राउतको उपचारमा समाजसेवीको साथ, तरुण दलमार्फत २५ हजार सहयोग

सबिना राई,जेठ १०, सोलुखुम्बु । सोलुखुम्बुका स्पाइनल इन्जुरी पीडित प्रकाश राउतको उपचार तथा पुनःस्थापनाका लागि समाजसेवी र युवानेताको पहलमा आर्थिक सहयोग जुटाइएको छ। नेचासल्यान गाउँपालिका–१ निवासी राउतलाई नेपाल तरुण दल सोलुखुम्बुले २५ हजार रुपैयाँ नगद सहयोग प्रदान गरेको हो।

थुलुङ दुधकोशी गाउँपालिका–१ का व्यवसायी तथा समाजसेवी बेद थापाले उपलब्ध गराएको रकम तरुण दल सोलुखुम्बुका अध्यक्ष अशोक कुमार झामार्फत हस्तान्तरण गरिएको जनाइएको छ। अध्यक्ष झा स्वयं स्पाइनल इन्जुरी पुनःस्थापना केन्द्र, साँगा पुगेर पीडित राउतका परिवारलाई सहयोग रकम बुझाएका थिए। आर्थिक अभावका बीच उपचार गराइरहेका राउतलाई राहत पुग्ने उद्देश्यले सहयोग गरिएको अध्यक्ष झाले बताएका छन् ।

कार्यक्रममा तरुण नेता विकास बस्नेतको पनि उपस्थिति रहेको थियो। सहभागीहरूले कठिन अवस्थामा रहेका बिरामीलाई सहयोग गर्न समाजका विभिन्न क्षेत्रलाई समेत आह्वान गरेका छन्। स्पाइनल इन्जुरीका कारण लामो समयदेखि उपचाररत राउतको पुनःस्थापनाका लागि थप सहयोग आवश्यक रहेको परिवारले जनाएको छ ।