माप्य दुधकोशीमा अपाङ्गता भएका व्यक्ति र परिवारलाई ५ दिने सुँगुरपालन तालिम

जेठ १०, सोलुखुम्बु । सोलुखुम्बुको माप्य दुधकोशी गाउँपालिकामा अपाङ्गता भएका व्यक्ति तथा तिनका परिवारका लागि ५ दिने सुँगुरपालन तालिम सम्पन्न गरिएको छ । करुणा फाउण्डेसन नेपाल, सामाजिक विकास मन्त्रालय कोशी प्रदेशको सहकार्य तथा गाउँपालिकाको आयोजनामा सञ्चालन गरिएको तालिममा १२ जना अपाङ्गता भएका व्यक्ति तथा तिनका परिवारका सदस्य सहभागी भएका थिए ।

“सीप सिकौँ, स्वरोजगार बनौँ, सुँगुरपालनबाट आत्मनिर्भर बनौँ” भन्ने नारासहित जेठ ६ गतेदेखि सुरु भएको तालिम आइतबार सम्पन्न भएको महिला तथा बालबालिका शाखाकी सहजकर्ता रमिला राईले जानकारी दिनुभयो । तालिम समापन कार्यक्रममा गाउँपालिका उपाध्यक्ष गौरव राई ले तालिमबाट प्राप्त ज्ञान र सीपलाई व्यवहारमा लागू गर्दै आर्थिक अवस्था सुदृढ बनाउन सहभागीहरुलाई आग्रह गर्नुभयो ।

उहाँले यस्ता सीपमूलक तालिमले अपाङ्गता भएका व्यक्तिहरुको आत्मनिर्भरता र आयआर्जनमा महत्वपूर्ण सहयोग पुग्ने विश्वास व्यक्त गर्नुभयो । तालिमको सहजीकरण सुजन राई ले गर्नुभएको थियो । तालिम समापनसँगै सहभागीहरूलाई निःशुल्क रूपमा सुगुँर/बङ्गुरका पाठापाठी तथा आवश्यक औषधि समेत वितरण गरिएको गाउँपालिकाले जनाएको छ ।