सोलुखुम्बु, जेठ १६ । सोलुखुम्बुको सदरमुकाम सल्लेरीस्थित नयाँ बजारमा मानसिक स्वास्थ्यसम्बन्धी जनचेतना अभिवृद्धि गर्ने उद्देश्यले सडक नाटक ‘निशा’ प्रदर्शन गरिएको छ । सोलुदुधकुण्ड नगरपालिकाको आयोजनामा सम्पन्न उक्त नाटकमा गार्मा माध्यमिक विद्यालयका विद्यार्थीहरूले विभिन्न पात्रमार्फत मानसिक स्वास्थ्यका समस्या, त्यसका प्रभाव तथा समाधानका उपायबारे सशक्त सन्देश प्रस्तुत गरेका थिए । नाटकको लेखन सोलुदुधकुण्ड नगरपालिकाका जनस्वास्थ्य निरीक्षक सुवास तामाङले गर्नुभएको हो ।
कार्यक्रममा सोलुदुधकुण्ड नगरपालिकाका मेयर नाम्गेल जाङ्बु शेर्पा, प्रमुख प्रशासकीय अधिकृत सुरेन्द्र थापा, वडा नम्बर ६ का वडा अध्यक्ष तथा नगर प्रवक्ता फुर्वा ग्याल्जेन शेर्पा, वडा नम्बर ७ का वडा अध्यक्ष सोनाम ग्याल्जेन शेर्पा, स्वास्थ्य शाखा संयोजक चमर मगर लगायत स्थानीयवासी तथा विदेशी नागरिकहरूको समेत उपस्थिति रहेको थियो । मानसिक स्वास्थ्यसम्बन्धी विषयमा समुदायस्तरमा सचेतना फैलाउने उद्देश्यले प्रस्तुत गरिएको नाटकले दर्शकहरूको सकारात्मक प्रतिक्रिया प्राप्त गरेको आयोजकले जनाएको छ ।
Discussion about this post