विद्युत पोलबाट करेन्ट चुहिँदा गाई मरेपछि स्थानीय आक्रोशित, प्राधिकरणले भन्यो फल्ट भयो

सोलुखुम्बुको थुलुङ दुधकोशी गाउँपालिका–१ डाँडाखर्कमा विद्युत पोलबाट करेन्ट चुहावट हुँदा एक गाई मरेपछि स्थानीयले नेपाल विद्युत प्राधिकरणको लापरबाहीप्रति गुनासो गरेका छन्।

स्थानीयका अनुसार पेम्बा तामाङको चरनमा छोडिएको गाई विद्युत पोलबाट चुहिएको करेन्ट लागेर मरेको थियो । यो घटना जेठ १६ गते शनिबार को हो । स्थानीयले करेन्ट चुहावटको समस्या रहेको विषयमा घटनापछि एक सातासम्म सम्बन्धित प्राविधिकलाई जानकारी गराउँदै आए पनि समयमै मर्मत तथा आवश्यक पहल नभएको आरोप लगाएका छन् ।

स्थानीयवासीले पटक–पटक जानकारी गराउँदा पनि समस्या समाधान नभएको भन्दै यस्ता घटनाले भविष्यमा मानवीय क्षति समेत हुन सक्ने भएकाले तत्काल आवश्यक कदम चाल्न सम्बन्धित निकायसँग माग गरेका छन्।

यस विषयमा जानकारी लिन रेडियो एभरेष्टले नेपाल विद्युत प्राधिकरणसँग सम्पर्क गरेको थियो। प्राधिकरणका कार्यालय प्रमुख लालबहादुर लम्सालले उक्त पोलमा फल्ट रहेको स्वीकार गर्दै समस्या समाधानका लागि दुई पटकसम्म कर्मचारी खटाइएको जानकारी दिनुभयो।

उहाँका अनुसार उक्त पोलमा बेला–बेलामा फल्ट आइरहने समस्या रहेको छ। फल्ट देखिएपछि दुई पटकसम्म मर्मत गरिएको भए पनि पुनः समस्या दोहोरिएको उहाँले बताउनुभयो। कार्यालयमा आवश्यक जनशक्तिको अभावका कारण कतिपय काम समयमा सम्पन्न गर्न कठिनाइ भइरहेको समेत उहाँको भनाइ छ।

प्राधिकरणले स्थानीयलाई विद्युत पोल तथा तार नजिक नजान, कुनै पनि तार नछुन र जोखिमपूर्ण स्थानबाट सुरक्षित दूरी कायम गर्न आग्रह गरेको छ। समस्या समाधानका लागि आवश्यक प्राविधिक प्रक्रिया अघि बढाइएको पनि प्राधिकरणले जनाएको छ।

घटनापछि स्थानीयवासीले विद्युत संरचनाको नियमित निरीक्षण, मर्मत तथा जोखिमयुक्त स्थानमा तत्काल सुधारका लागि सम्बन्धित निकायको ध्यानाकर्षण गराएका छन्। यता प्राधिकरणले भने समस्या समाधानका लागि आवश्यक पहल भइरहेको जनाएको छ।