खाेटाङका राईलाई खुम्बुमा गरियाे उद्धार, प्रहरी र स्थानीयको सहयोगमा अस्पतालतर्फ लगियाे

सोलुखुम्बु, जेठ १७ — सोलुखुम्बुको खुम्बु पासाङल्हामु गाउँपालिका–५ ठमुस्थित निर्माणाधीन लौदो गुम्बामा कार्यरत एक बिरामी मजदुरको प्रहरी र स्थानीयवासीको सहयोगमा उद्धार गरी उपचारका लागि अस्पतालतर्फ ल्याइएको छ।

जिल्ला खोटाङको केपिलासगढी गाउँपालिका–७ निवासी अन्दाजी ३० वर्षीय अशोक राई जेठ १५ गतेदेखि पिसाब नलाग्ने र पेट दुख्ने समस्याबाट पीडित भएको जानकारी इलाका प्रहरी कार्यालय थाम्बुचेमा प्राप्त भएको थियो। सूचना प्राप्त हुनासाथ इलाका प्रहरी कार्यालय थाम्बुचेबाट खटिएको प्रहरी टोली र स्थानीय बासिन्दाको सहयोगमा उनको उद्धार कार्य सुरु गरिएको थियो।

उद्धारपछि अशोक राईलाई उपचारका लागि नाम्चेस्थित ओमहोङ गिल नाम्चे सामुदायिक अस्पतालतर्फ ल्याइँदै गरिएको प्रहरीले जनाएको छ। दुर्गम भौगोलिक अवस्थाका कारण बिरामीलाई बोकेर अस्पतालसम्म पुर्‍याउनुपर्ने अवस्था रहेको र अस्पताल पुग्न करिब २ घण्टा ३० मिनेट समय लाग्ने बताइएको छ। उद्धार स्थलदेखि अस्पतालको दूरी करिब ७ किलोमिटर रहेको जनाइएको छ।

प्रहरीका अनुसार उद्धारका क्रममा बिरामीको अवस्था मध्यम रहेको छ। उनी सामान्य रूपमा बोल्न सक्ने अवस्थामा रहेका छन्। स्वास्थ्य समस्याका कारण तत्काल उपचार आवश्यक देखिएपछि प्रहरी र स्थानीयवासीले संयुक्त रूपमा उद्धार कार्य सम्पन्न गरेका हुन्।

खुम्बु क्षेत्रका दुर्गम बस्ती तथा निर्माणस्थलहरूमा काम गर्ने मजदुरहरू स्वास्थ्य समस्या पर्दा यातायात तथा स्वास्थ्य सेवाको सीमित पहुँचका कारण कठिनाइमा पर्ने गरेका छन्। यस्ता अवस्थामा स्थानीय समुदाय र सुरक्षा निकायको समन्वयमा गरिने उद्धार कार्यले बिरामीलाई समयमै उपचार सेवा प्राप्त गर्न सहयोग पुग्ने गरेको छ।

प्रहरीले दुर्गम क्षेत्रमा आपत्कालीन स्वास्थ्य समस्या वा अन्य मानवीय संकटका घटना भएमा तत्काल नजिकको सुरक्षा निकायलाई जानकारी गराउन समेत आग्रह गरेको छ।