सोलुखुम्बु, जेठ १६ — राष्ट्रिय स्वतन्त्र पार्टी (रास्वपा) सोलुदुधकुण्ड नगर समितिको सभापतिमा पेम्बारिन्जी शेर्पा सर्वसम्मत चयन हुनुभएको छ। शनिबार सम्पन्न नगर अधिवेशनले शेर्पाको नेतृत्वमा १५ सदस्यीय नगर कार्यसमिति गठन गरेको हो।
संगठन विस्तार तथा आगामी जिल्ला अधिवेशनको तयारीलाई केन्द्रमा राखेर सम्पन्न अधिवेशनमा रास्वपा सोलुखुम्बुका जिल्ला सभापति नारायणकाजी कार्की प्रमुख अतिथि रहनुभएको थियो। जिल्ला कोषाध्यक्ष तथा निर्वाचन संयोजक रमेश कुमार बस्नेत विशिष्ट अतिथि रहनुभएको कार्यक्रममा नगर उपसभापति भानुभक्त श्रेष्ठ, नगर सचिव शङ्कर श्रेष्ठ तथा आरएटीटीका जिल्ला सह–संयोजक टेकबहादुर श्रेष्ठलगायतको उपस्थिति रहेको थियो। कार्यक्रममा सोलुदुधकुण्ड नगरपालिकाका ११ वटै वडाका वडा सभापति तथा प्रतिनिधिहरूको समेत सहभागिता रहेको जनाइएको छ।
अधिवेशनले नगर उपसभापतिमा गोमा बस्नेत, सचिवमा शङ्कर श्रेष्ठ तथा कोषाध्यक्षमा भानुभक्त श्रेष्ठलाई चयन गरेको छ।
त्यसैगरी सदस्यहरूमा इन्दिरा बस्नेत, रमिता मगर, सङ्गीता मगर श्रेष्ठ, कर्मा शेर्पा, लाक्पा शेर्पा, पूर्णबहादुर श्रेष्ठ, पेम्बा शेर्पा, अमितराज भण्डारी, काजी तामाङ, टिकामाया विक र करिना बस्नेत कार्की चयन हुनुभएको छ।
नवनिर्वाचित समितिले आगामी जिल्ला अधिवेशनलाई सफल बनाउन पार्टीका सबै तहका नेता तथा कार्यकर्तालाई सक्रिय रूपमा परिचालन गर्ने निर्णय गरेको जनाएको छ। साथै संगठनलाई थप सुदृढ, समावेशी र जनआधारित बनाउने उद्देश्यसहित आवश्यक तयारी तथा समन्वयलाई प्रभावकारी बनाउने प्रतिबद्धता व्यक्त गरिएको छ।
अधिवेशनले आगामी जेठ २४ गते हुने जिल्ला अधिवेशन सफल पार्न आवश्यक तयारी, समन्वय र सहभागिता सुनिश्चित गर्ने प्रस्तावसमेत सर्वसम्मत रूपमा पारित गरेको छ।
रास्वपाले पछिल्लो समय स्थानीय तहमा संगठन सुदृढीकरण, सदस्य विस्तार तथा अधिवेशन केन्द्रित गतिविधिलाई तीव्रता दिइरहेका बेला सोलुदुधकुण्ड नगर समितिको गठनलाई संगठन विस्तारतर्फको महत्वपूर्ण कदमका रूपमा हेरिएको छ।
Discussion about this post