सोलुदुधकुण्ड–२ का विद्यालयलाई प्रविधिमैत्री बनाउँदै वडा कार्यालय, तीन विद्यालयलाई इन्टर्याक्टिभ प्यानल बोर्ड वितरण

सोलुखुम्बु, जेठ १८ । सोलुखुम्बुको सोलुदुधकुण्ड नगरपालिका वडा नम्बर २ ले वडाभित्रका विद्यालयहरूलाई प्रविधिमैत्री बनाउने अभियानलाई तीव्रता दिएको छ । शैक्षिक सत्र २०८२ को शैक्षिक समीक्षा, शैक्षिक सामग्री वितरण, विद्यालय पुरस्कार तथा सम्मान कार्यक्रमका अवसरमा वडा कार्यालयले तीन वटा विद्यालयलाई इन्टर्याक्टिभ प्यानल बोर्ड वितरण गरेको हो । आईतबार आयोजित कार्यक्रममा सोलुदुधकुण्ड नगरपालिकाका मेयर नाम्गेल जाङ्बु शेर्पाले शिक्षकहरूले आफ्ना बालबालिकालाई प्रदान गर्ने शिक्षाजस्तै सम्पूर्ण विद्यार्थीलाई गुणस्तरीय शिक्षा दिनुपर्नेमा जोड दिनुभयो ।

नगरपालिकाले यस वर्ष शिक्षा क्षेत्रमा सन्तोषजनक नतिजा हासिल गरेको उल्लेख गर्दै आगामी दिनमा अझ उत्कृष्ट नतिजा ल्याउन शिक्षकहरूलाई प्रेरित गर्नुभयो । कार्यक्रममा उपमेयर गान्धिमाया तामाङले शिक्षा क्षेत्रको विकास र सुधारका लागि शिक्षकहरूको भूमिका महत्वपूर्ण रहने बताउँदै थप मेहनत र प्रतिबद्धतासहित काम गर्न आग्रह गर्नुभयो ।

वडा अध्यक्ष ङ्वाङ ठिले शेर्पाले वडाभित्रको शिक्षा क्षेत्रमा आमूल परिवर्तन ल्याउन विभिन्न कार्यक्रम सञ्चालन भइरहेको जानकारी दिनुभयो । वर्तमान समय प्रविधिमैत्री भएकाले विद्यालयहरूमा आधुनिक शिक्षण प्रणालीको विकास आवश्यक रहेको उल्लेख गर्दै वडा कार्यालयले सक्दो सहयोग गर्ने प्रतिबद्धता व्यक्त गर्नुभयो । उहाँले शिक्षा क्षेत्रमा सकारात्मक परिवर्तन ल्याउन वडा कार्यालयले विभिन्न योजनामार्फत काम गरिरहेको बताउँदै आगामी दिनमा अन्य विद्यालयलाई पनि इन्टर्याक्टिभ प्यानल बोर्ड उपलब्ध गराइने जानकारी दिनुभयो ।

कार्यक्रममा वडा भित्रका कक्षा ४ देखि ८ सम्मका विद्यालयमध्ये उत्कृष्ट कार्यसम्पादन गर्ने विद्यालयहरूलाई पुरस्कार तथा सम्मान गरिएको थियो । साथै नेपाली, अंग्रेजी, गणित, विज्ञान र सामाजिक विषयमा अपेक्षाकृत कम नतिजा ल्याएका विद्यालयका विषय शिक्षकहरूसँग वडा अध्यक्षले अन्तरक्रिया गर्दै नतिजा कमजोर हुनुका कारणबारे छलफल गर्नुभएको थियो ।

वडा कार्यालयले विद्यालयहरूलाई प्रविधिमैत्री बनाउने तथा शैक्षिक गुणस्तर अभिवृद्धि गर्ने उद्देश्यका साथ आगामी दिनमा पनि आवश्यक सहयोग र कार्यक्रमलाई निरन्तरता दिने जनाएको छ । शिक्षामा प्रविधिको प्रयोग बढाउँदै गुणस्तरीय शिक्षातर्फ अग्रसर सोलुदुधकुण्ड–२ को यो अभियानले विद्यालयको सिकाइ वातावरण सुधार्नुका साथै विद्यार्थीको शैक्षिक उपलब्धि बढाउन सहयोग पुग्ने अपेक्षा गरिएको छ ।