स्वास्थ्य चौकी गार्मा बन्यो किशोरकिशोरीमैत्री स्वास्थ्य संस्था

जेठ १७, सोलुखुम्बु । सोलुखुम्बुको सोलुदूधकुण्ड नगरपालिका–७ मा अवस्थित स्वास्थ्य चौकी गार्मालाई किशोरकिशोरीमैत्री स्वास्थ्य संस्था घोषणा गरिएको छ। सोलुदूधकुण्ड नगरपालिकाका प्रमुख नाम्गेल जाङ्बु शेर्पाले एक समारोहबीच स्वास्थ्य चौकीलाई औपचारिक रूपमा किशोरकिशोरीमैत्री स्वास्थ्य संस्था घोषणा गर्नुभएको हो।

कार्यक्रममा नगर प्रमुख शेर्पाले किशोरकिशोरी नै राष्ट्रका भविष्यका आशा भएकाले उनीहरूको स्वास्थ्य तथा समग्र विकासलाई नगरपालिकाले गम्भीर र संवेदनशील रूपमा प्राथमिकता दिँदै आएको बताउनुभयो। उहाँले नगरपालिकाले स्वास्थ्यलगायतका आधारभूत सेवामा सबै नागरिकको समान पहुँच सुनिश्चित गर्न विभिन्न कार्यक्रम सञ्चालन गरिरहेको उल्लेख गर्दै निर्धक्क भएर सेवा लिन आग्रह गर्नुभयो। उपप्रमुख गान्धिमाया तामाङले किशोरावस्था व्यक्तिको भविष्य निर्धारण गर्ने महत्वपूर्ण चरण भएकाले यस उमेर समूहको स्वास्थ्यमा विशेष ध्यान दिनुपर्ने आवश्यकता औँल्याउनुभयो।

उहाँले नगरपालिकाभित्र रहेका स्वास्थ्य संस्था तथा अन्य सरकारी कार्यालयहरूमा सबैको समान पहुँच र सहभागिता सुनिश्चित गर्न कुनै कसर बाँकी नराखिने बताउनुभयो। वडा नं. ७ का अध्यक्ष सोनाम ग्याल्जेन शेर्पाले सक्षम र जिम्मेवार नागरिक निर्माणका लागि किशोरकिशोरीलाई उपयुक्त वातावरण उपलब्ध गराउन आवश्यक रहेको उल्लेख गर्दै उक्त घोषणाले त्यस अभियानलाई थप बल पुर्याउने विश्वास व्यक्त गर्नुभयो। सो अवसरमा नगर प्रमुख शेर्पाले वडा अध्यक्ष सोनाम ग्याल्जेन शेर्पालाई किशोरकिशोरीमैत्री स्वास्थ्य संस्था घोषणाको प्रमाणपत्र हस्तान्तरण गर्नुभएको थियो।

उहाँले स्वास्थ्यजस्तो संवेदनशील क्षेत्रमा किशोरकिशोरीको सक्रिय सहभागिताले परिवार तथा समाजमा सकारात्मक सन्देश प्रवाह हुने विश्वास व्यक्त गर्नुभयो। सोलुदूधकुण्ड नगरपालिकाका जनस्वास्थ्य निरीक्षक सुवास तामाङका अनुसार नेपाल सरकारको निर्देशिकामा उल्लेखित सम्पूर्ण सूचकको मूल्याङ्कनका आधारमा स्वास्थ्य चौकी गार्मालाई किशोरकिशोरीमैत्री स्वास्थ्य संस्था घोषणा गरिएको हो।

स्वास्थ्य संस्थाको सेवा प्रवाह, व्यवस्थापन समितिमा किशोरकिशोरीको सहभागिता, भौतिक पूर्वाधार, आवश्यक औजार–उपकरण, सूचना तथा सञ्चार सामग्रीलगायत विभिन्न पक्षको अध्ययन तथा मूल्याङ्कन गर्दा सबै सूचकहरू प्रभावकारी रूपमा कार्यान्वयन भएको पाइएपछि स्वास्थ्य चौकीलाई किशोरकिशोरीमैत्री स्वास्थ्य संस्था घोषणा गरिएको जनाइएको छ।