रास्वपाको थुलुङ दुधकोशी गाउँपालिका प्रथम अधिवेशन सम्पन्न, युवराज बस्नेतको नेतृत्वमा नयाँ समिति गठन

सोलुखुम्बु, जेठ १७ — राष्ट्रिय स्वतन्त्र पार्टी (रास्वपा) को थुलुङ दुधकोशी गाउँपालिका प्रथम अधिवेशन शनिबार सम्पन्न भएको छ। अधिवेशनले युवराज बस्नेतको नेतृत्वमा ११ सदस्यीय गाउँपालिका कार्यसमिति सर्वसम्मत रूपमा चयन गरेको छ।

अधिवेशनबाट सभापतिमा वडा नं. १ का युवराज बस्नेत, उपसभापतिमा कुमार बस्नेत, सचिवमा वडा नं. ८ का महन्त राई तथा कोषाध्यक्षमा वडा नं. १ का मोहन भुजेल चयन हुनुभएको छ।

त्यसैगरी खुल्ला सदस्यमा वडा नं. ५ का जिराकाजी बस्नेत, वडा नं. २ की कमला बस्नेत र वडा नं. ६ की अनुजा लामिछाने चयन हुनुभएको छ। महिला सदस्यमा वडा नं. १ की युनिशा बस्नेत र वडा नं. ७ की समिता राई (केसी) चयन हुनुभएको छ। सदस्यहरूमा वडा नं. ८ का राजु विक र वडा नं. ९ का सबिन्द्र तामाङ रहनुभएको छ।

अधिवेशनले गाउँपालिका तहमा पार्टी संगठनलाई थप सुदृढ, सक्रिय र जनमुखी बनाउने प्रतिबद्धता व्यक्त गरेको छ। नवगठित समितिले स्थानीय स्तरमा संगठन विस्तार, सदस्यता वृद्धि तथा नागरिकका सरोकारका विषयलाई प्राथमिकताका साथ अघि बढाउने जनाएको छ।

नवनिर्वाचित कोषाध्यक्ष मोहन भुजेलले आफूलाई महत्वपूर्ण जिम्मेवारीमा चयन गर्ने सम्पूर्ण प्रतिनिधि, नेता, कार्यकर्ता तथा शुभेच्छुकप्रति आभार व्यक्त गर्नुभएको छ। उहाँले पार्टीले आफूमा राखेको विश्वासलाई सम्मान गर्दै इमान्दारिता, पारदर्शिता र उत्तरदायित्वका साथ जिम्मेवारी निर्वाह गर्ने प्रतिबद्धता व्यक्त गर्नुभयो।

अधिवेशनमा सहभागी वक्ताहरूले राष्ट्रिय स्वतन्त्र पार्टीले स्थानीय तहमा संगठन विस्तारलाई तीव्रता दिइरहेको उल्लेख गर्दै नवगठित समितिले गाउँपालिकामा पार्टीको आधार बलियो बनाउन महत्वपूर्ण भूमिका खेल्ने विश्वास व्यक्त गरेका थिए।

कार्यक्रममा अधिवेशन सफल बनाउन प्रत्यक्ष तथा अप्रत्यक्ष रूपमा सहयोग गर्ने सबैप्रति धन्यवाद ज्ञापन गरिएको थियो। साथै नवगठित समितिलाई सफल कार्यकालको शुभकामना दिँदै गाउँपालिकाका नागरिकका मुद्दा र आवश्यकतालाई केन्द्रमा राखेर काम गर्न आग्रह गरिएको छ।

रास्वपाले आगामी दिनमा थुलुङ दुधकोशी गाउँपालिकाभित्र संगठन सुदृढीकरण, जनसम्पर्क विस्तार र नागरिकका आवाजलाई सशक्त रूपमा उठाउने लक्ष्यका साथ गतिविधि सञ्चालन गर्ने जनाएको छ।