देउसामा सकियो ५ दिने साबुन, फिनेल, हार्पिक र सरफ बनाउने तालिम

जेठ १८, सोलुखुम्बु । सोलुखुम्बुको थुलुङ दुधकोशी गाउँपालिका–७ देउसा मा सञ्चालन गरिएको ५ दिने साबुन, फिनेल, हार्पिक र सरफ बनाउने तालिम सोमबार सम्पन्न भएको छ। थुलुङ दुधकोशी गाउँपालिका महिला तथा बालबालिका शाखा र दुधकोशी सामुदायिक सिकाई केन्द्र को सहकार्य तथा वडा कार्यालयको आयोजनामा  बिहीबारदेखि सञ्चालन भएको उक्त तालिममा ४५ जनाको सहभागिता रहेको वडा अध्यक्ष भोजराज कार्की ले जानकारी दिनुभयो।

तालिममार्फत स्थानीय नागरिकलाई घरेलु तथा व्यावसायिक रूपमा साबुन, हार्पिक, फिनेल तथा सरफ उत्पादन गर्ने सीप प्रदान गरिएको बताइएको छ। सहभागीहरूलाई उत्पादन प्रक्रिया, गुणस्तर व्यवस्थापन तथा व्यवसाय सञ्चालनसम्बन्धी आधारभूत ज्ञानसमेत दिइएको थियो। वडा अध्यक्ष कार्कीले स्थानीय स्तरमै आयआर्जनका अवसर सिर्जना गर्दै सहभागीलाई उद्यमशील बनाउने र आर्थिक विकासमा टेवा पुर्‍याउने उद्देश्यले तालिम सञ्चालन गरिएको बताउनुभयो।

उहाँले तालिमबाट प्राप्त सीपलाई व्यवहारमा उतार्दै सहभागीहरूले स्वरोजगार तथा साना उद्यम सञ्चालन गर्न सक्ने अपेक्षा व्यक्त गर्नुभयो। तालिम समापन कार्यक्रममा सहभागीहरूलाई प्रमाणपत्र वितरण गरिएको थियो। आयोजकका अनुसार यस्ता सीपमूलक कार्यक्रमले स्थानीय नागरिकको क्षमता अभिवृद्धि गर्नुका साथै आत्मनिर्भरता प्रवर्द्धन गर्न महत्वपूर्ण भूमिका खेल्ने विश्वास गरिएको छ।