सोलु प्रहरीले गर्यो हराएका जर्मनी नागरिकको सकुशल उद्धार

सबिना राई, सोलुखुम्बु, जेठ १८ । सोलुखुम्बुको लिखुपिके गाउँपालिका क्षेत्रमा बाटो भुलेर हराएका जर्मनीका एक नागरिकलाई प्रहरीले सकुशल उद्धार गरेको छ । जिल्ला प्रहरी कार्यालय, सोलुखुम्बुका अनुसार जर्मनीका २१ वर्षीय एलियास वेन्डस्चुह जेठ १७ गते बिहान ९ बजे पिके पिकबाट जिरीतर्फ पैदल यात्रा गर्ने क्रममा बाटो भुलेर हराएका थिए ।

उनी लिखुपिके गाउँपालिका–५ किन्जास्थित ठूलो भिर जंगल क्षेत्रमा सम्पर्कविहीन भएका थिए । आज बिहान ७ बजे एलियासले ह्वाट्सएपमार्फत आफू हराएको जानकारी जिल्ला प्रहरी कार्यालय, सोलुखुम्बुलाई गराएका थिए । सूचना प्राप्त हुनासाथ जिल्ला प्रहरी कार्यालय, अस्थायी प्रहरी चौकी गोली, प्रहरी चौकी किन्जा र प्रहरी चौकी चौलाखर्कबाट प्रहरी टोली परिचालन गरिएको थियो ।

प्रहरी टोलीसँगै स्थानीय जनप्रतिनिधि र स्थानीयवासीको सहयोगमा खोजी कार्य सञ्चालन गरिएको थियो । खोजतलासका क्रममा आज दिउँसो करिब २ बजे लिखुपिके गाउँपालिका–१ टाङ्बुचेस्थित जंगल क्षेत्रमा एलियासलाई फेला पारिएको प्रहरीले जनाएको छ । उद्धारपछि उनलाई सकुशल प्रहरी चौकी किन्जा ल्याइएको छ ।

प्रहरीका अनुसार उनको स्वास्थ्य अवस्था सामान्य रहेको छ । जिल्ला प्रहरी कार्यालय, सोलुखुम्बुले दुर्गम तथा अपरिचित पदमार्गमा यात्रा गर्ने पर्यटकलाई आवश्यक तयारी, स्थानीय मार्गदर्शकको सहयोग तथा सञ्चार सम्पर्कका माध्यम साथमा राख्न आग्रह गरेको छ ।