प्रधानमन्त्री बालेनविरुद्ध खोटाङमा विद्यार्थी संगठनको प्रदर्शन, पुतला दहन

जेठ १९, सोलुखुम्बु । प्रधानमन्त्री बालेन्द्र शाहले प्रतिनिधिसभामा दिएको भनिएको विवादित अभिव्यक्तिको विरोधमा खोटाङका विभिन्न विद्यार्थी संगठनहरूले सोमबार साँझ दिक्तेलमा प्रदर्शन गर्दै पुतला दहन गरेका छन्। नेपाल विद्यार्थी संघ , अनेरास्ववियु, अखिल लगायतका विद्यार्थी संगठनहरूले दिक्तेलस्थित किरातचोकमा प्रधानमन्त्रीको पुतला जलाउँदै चर्को नाराबाजी गरेका हुन्। प्रदर्शनकारीहरूले नेपालको राष्ट्रिय स्वाधीनता, सार्वभौमिकता तथा भौगोलिक अखण्डतालाई कमजोर बनाउने खालको अभिव्यक्ति आएको आरोप लगाउँदै प्रधानमन्त्रीको राजीनामा माग गरेका छन्।

प्रधानमन्त्री शाहले आइतबार प्रतिनिधिसभामा ‘नेपालले पनि भारतको सीमा मिचेको’ भन्ने अभिव्यक्ति दिएको भन्दै विद्यार्थी संगठनहरूले त्यसप्रति आपत्ति जनाएका छन्। उनीहरूले उक्त अभिव्यक्तिलाई गैरजिम्मेवार, आपत्तिजनक तथा आत्मसमर्पणवादी भएको टिप्पणी गरेका छन्। यसअघि नै विद्यार्थी संगठनहरूले आइतबार जिल्ला प्रशासन कार्यालय खोटाङमा ज्ञापनपत्र बुझाउँदै प्रधानमन्त्रीको भनाइप्रति औपचारिक विरोध जनाएका थिए। ज्ञापनपत्रमार्फत उनीहरूले नेपाल–भारत सीमा सम्बन्धी विषयमा प्रधानमन्त्रीको धारणा राष्ट्रिय हितविपरीत रहेको दाबी गरेका थिए।

यता, प्रधानमन्त्रीको अभिव्यक्तिको विरोधमा श्रम संस्कृति पार्टी खोटाङले पनि प्रदर्शन गरेको छ। पार्टीका कार्यकर्ताहरूले सोमबार दिक्तेलस्थित रत्नपार्कमा सांकेतिक नाराबाजीसहित केहीबेर विरोध कार्यक्रम सञ्चालन गरेका थिए।विरोध प्रदर्शनमा सहभागी विभिन्न संगठनका नेताहरूले राष्ट्रिय हितसँग सम्बन्धित विषयमा जिम्मेवार पदमा रहेका व्यक्तिहरूले सावधानीपूर्वक अभिव्यक्ति दिनुपर्ने बताएका छन्। उनीहरूले प्रधानमन्त्रीबाट आएको भनिएको अभिव्यक्तिबारे स्पष्ट धारणा सार्वजनिक गर्न समेत माग गरेका छन्।