ज्वालामाई मन्दिरलाई एभरेष्टको १ लाख बढी आर्थिक सहयोग

सोलुखुम्बुको प्रसिद्ध धार्मिक स्थल ज्वालामाई मन्दिरलाई १ लाख बढी आर्थिक सहयोग प्राप्त भएको छ । शनिबार मन्दिर दर्शन गर्न आउनुभएका धनकुटाका एभरेष्ट थापा (पर्शुराम)ले मन्दिरको कोषमा जम्मा हुनेगरी १ लाख ११ हजार १ सय ११ रुपैयाँ आर्थिक सहयोग प्रदान गर्नुभएको हो ।

हाल अमेरिकाको सिकागो राज्यमा बसोबास गर्दै आउनुभएका थापाले ज्वालामाई मन्दिर क्षेत्र विकास समितिको कोषमा जम्मा हुनेगरि उक्त रकम बराबरको चेक आज मन्दिर क्षेत्र विकास समितिका उपाध्यक्ष तथा जिल्ला समन्वय समिति सोलुखुम्बुका उपप्रमुख टिका माया मगरलाई हस्तान्तरण गर्नुभएको हो ।

जिल्लाको सोलुदूधकुण्ड नगरपालिका वडा नम्बर ३ लोदिङ मा रहेको उक्त मन्दिरलाई सो रकम हस्तान्तरण गर्दै थापाले आफु र आफ्नो परिवारको मनोकामना पुरा भएकोमा आफुले थोरै भएपनि सहयोग गरेको बताउनुभयो । रकम हस्तान्तरणमा मन्दिर क्षेत्र विकास समितिका प्रचारप्रसार संयोजक सन्तोष मगर (र्‍याविट)ले यसरी प्राप्त भएको रकमलाई जम्मा गरेर मन्दिरको संरक्षण तथा भौतिक संरचना निर्माणका लागी खर्च गर्ने बताउनुभएको छ ।

रकम हस्तान्तरणका क्रममा एभरेष्ट मिडिया टेक प्रालिका संचालक समिति सचिव अशोक राई, मन्दिर क्षत्र विकास समितिका अन्य सदस्यहरु तथा मन्दिर दर्शनका लागी उपस्थित भक्तजन लगायत रेडियो एभरेष्टका पत्रकारहरुको उपस्थिति रहेको थियो ।