सामुदायिक आँखा केन्द्रमा सुरु भयो शल्यक्रीया सिविर

सोलुखुम्बुको फाप्लुमा आजबाट आँखा शिविर सुरु भएको छ । जिल्ला सामुदायिक आँखा केन्द्र सोलुखुम्बु र तिलगंगा आँखा प्रतिष्ठानको आयोजनामा आज बाट जिल्ला सामुदायिक आँखा केन्द्र फाप्लुमा आँखा शिविर सुरु भएको हो । आँखा मानव शरीरको एक महत्त्वपूर्ण अनि अति आवश्यक अङ्ग हो । उमेर बित्दै गएपछि उमेर हदका कारण होस वा अन्य विभिन्न कारण आँखामा मोतिया विन्दुको समस्या आउने गर्छ । यहि समस्यालाई मध्येनजर गर्दै सोलुखुम्बुको फाप्लुमा सुरु भएका मोतियाविन्दु शल्यक्रिया शिविरमा आज जिल्ला भरिका ५३ जना विरामीले यस सम्बन्धी सेवा लिएका छन् । जसमा २० पुरुष र ३३ महिला रहेका छन् ।

सोलुखुम्बुको सोलुदूधकुण्ड नगरपालिका वडा नम्बर ११ तिङलाका दावा जाङ्मु शेर्पामा करिब ६ महिना देखी आँखाको समस्या थियो । उहाँले विभिन्न अस्पताल तथा विशेषज्ञकोमा धाउनुभयो तर कुनै पार नचले पछि अहिले फाप्लु मा जिल्ला सामुदायिक आँखा केन्द्रले सुरु गरेको मोतियाविन्दु शल्यक्रिया सम्बन्धी सेवा लिएर आँखा निको हुने विश्वासमा हुनुहुन्छ ।

तिङलाकै सर्किनी शेर्पा पनि विगत लामो समय देखी आँखामा मोतिया विन्दु समस्याले आँखा देख्न नसक्ने अवस्थामा हुनुहुन्थ्यो । तर तिलगंगा आँखा प्रतिष्ठानका विशेषज्ञ डाक्टरबाट मोतिया विन्दुको शल्यक्रिया गराएपछि अव उहाँ आँखा देख्न पाउने खुसीले हर्षित हुनुहुन्छ ।

आँखाकै समस्याका कारण थुलुङ दूधकोकी गाउँपालिका लोखीमबाट फाप्लु सम्म आइपुग्नुभयो अक्कल बहादुर राई । उहाँ अहिले ७२ बर्ष हुनुभयो तर आँखाको ज्योति धमिलो हुदा निकै समस्या भोग्नु परिरहेको थियो । अहिले मोतिया विन्दु शल्यक्रिया गरेपछि आँखा देख्न पाउने खुसीले उहाँ पनि खुसी देखिनुहुन्छ ।

जिल्ला सामुदायिक आँखा केन्द्र सोलुखुम्बुले विभिन्न समयमा आँखा सम्बन्धी सेवाहरू प्रदान गर्दै आइरहेको छ । अहिले पनि गत चैत्र ५ गते देखी पालिकाहरूमा छनौट शिविर सञ्चालन गरी मोतिया विन्दु शल्यक्रिया गर्नुपर्ने बिरामीहरू छनौट गरेर शल्यक्रिया गरिएको आँखा केन्द्र फाप्लु को भनाई छ । बिरामीहरूलाई आँखा सम्बन्धी समस्या समाधान गरी सहज जीवन दिने हेतुले आँखा शल्यक्रिया शिविर आयोजना गरिएको जिल्ला सामुदायिक आँखा केन्द्र सोलुखुम्बुका दिनेश राई बताउनुहुन्छ । मोतिया विन्दुको उपचार शत प्रतिशत सफल हुने भएकाले उपचार गरिने सबै बिरामीहरूको आँखा निको हुने उहाँको दाबी छ ।

विभिन्न कारण आँखामा समस्या आउँदा आँखाको ज्योति गुम्ने भएकाले बृद्धबृद्धाहरुमा गम्भीर समस्या निम्तिन्छ । यस्तो समस्याले उनीहरूको जीवनयापनमा निकै जटिल हुने गर्छ तसर्थ समयमै समस्याको पहिचान गरी समाधान तर्फ ध्यान दिन सके संसार हेर्ने आँखाहरू अँध्यारोमा रुमलिनु नपर्थ्यो कि ?

यस सम्बन्धी भिडियो सामाग्री रेडियो एभरेष्टको फेसबुक तथा युट्युव मार्फत………..