जलविद्युत कम्पनीहरुले अस्तु समेत बगाउन पानी छाडेनन् ः नेपाली कांग्रेस

हिमाली जिल्ला सोलुखुम्बुमा निर्मित जलविद्युत आयोजनाहरुले जनतालाई दुःख दिएको काँग्रेस नेताहरुले बताएका छन् । मंगलबार जिल्ला प्रशासन कार्यालय सोलुखुम्बुका सहायक प्रमुख जिल्ला अधिकारी सरोज अर्याललाई मौखिक ध्यानाकर्षण गराउँदै काँग्रेस नेताहरुले आयोजनाले जनतालाई सास्ती खेपाएको आरोप लगाएका हुन् ।

जिल्लाका विभिन्न नदि तथा खोलाहरुमा निर्माण गरिएका जलविद्युत आयोजनाहरुले न्युनतम मापदण्डको समेत ख्याल नगरि विभिन्न बहानामा जनतालाई दुःख दिइरहेको प्रति चासो राख्दै जिल्ला प्रशासन कार्यालयमा मौखिक ध्यानाकर्षण गराइएको नेपाली कांग्रेस जिल्ला कार्य समिति सोलुखुम्बु सचिव युवराज घिमिरेले बताउनुभयो ।

उहाँले जलविद्युत आयोजनाहरुले खोलामा छाड्नु पर्ने १० प्रतिशत पानी सम्म नछाड्दा जनताले लाश जलाएको अस्तु सम्म बगाउन नपाउने स्थिति रहेको बताउनुभयो । यस्तै आयोजनाहरुले मुआब्जा वितरणमा ढिलासुस्ती गर्दा प्रभावित क्षेत्रका जनताहरुले मुआब्जाका निम्ति पटक पटक धाइरहनुपर्ने अवस्था कायम रहेको उहाँको भनाई छ ।

यस्तै, नागरिकता वितरण, राष्ट्रिय परिचयपत्र वितरणमा भएका समस्याका विषयमा पनि छलफल गरि समस्या सामधानका लागी अनुरोध गरिएको उहाँको भनाई छ । ध्यानाकर्षण गराउदै कांग्रेसले यथासिघ्र समस्या सामधानका लागी प्रशासनले पहल नगरे कतै प्रशासनको समेत संलग्नता त छैन ? भन्ने प्रश्न उब्जने उहाँको दावी छ ।

ध्यानाकर्षण लागी कांग्रेसका केन्द्रिय सदस्य बल बहादुर केसी, पुर्व सभापति विनोद बस्नेत, उपसभापति घनराज सुनुवार तथा जिल्ला कार्य समितिका पदाधिकारी तथा महाधिवेशन प्रतिनिधी प्रकाश सिंह कार्की, जिवन गुरुङ, सोताङ गाउँपालिका सोलुखुम्बुका अध्यक्ष तथा महाधिवेशन प्रतिनिधि खिलराज बस्नेत, कुश राज राई, महेन्द्र दिप राई, रिना उप्रेती केसी, छिन्डी ल्हमु शेर्पा, एका कुमारी कार्की, धर्म नेपली लगायत विभिन्न भातृ संगठनका प्रतिनिधिहरु लगायतको उपस्थिति रहेको नेविसंघ केन्द्रिय सदस्य दिनराज बास्तोलाले जानकारी दिनुभयो ।

सो क्रममा काँग्रेस महाधिवेशन प्रतिनिधि प्रकास सिंह कार्कीले जलविद्युत आयोजनाका कारण जलचर प्राणीहरूको अस्तित्व नै समाप्त भएको तथा पर्यावरणीय सन्तुलन विग्रिएको ले जिम्मेवार निकाय संवेदनशील हुनुपर्ने बताउनु भयो ।