नेकपा एमाले सोलुखुम्बुको जिल्ला आधिवेशन सुरु, बादलले गरे उद्घाटन

नेकपा एमाले सोलुखुम्बुको आठौँ जिल्ला अधिवेशन सुरु भएको छ । आज सदरमुकाम सल्लेरी स्थित योङ्ग स्टार क्लबको कभर्डहलमा नेकपा एमालेका केन्द्रिय उपाध्यक्ष तथा पुर्व गृहमन्त्री राम बहादुर थापा बादलले उद्घाटन गरेपछि जिल्ला अधिवेशन सुरु भएको हो ।

उद्घाटनका क्रममा कार्यक्रमका प्रमुख अतिथि तथा पुर्व गृहमन्त्री बादलले देशमा कम्युनिष्ट बिना विकास सम्भव नभएको बताउनुभएको छ । मिसन ८४ नेकपा एमालेको हालको मूल मन्त्र भएकाले आगामी निर्वाचनमा सोलुखुम्बुको ३ वटै तहको निर्वाचनमा एमालेको वर्चस्व राख्न सक्ने नेतृत्व यो अधिवेशनबाट चुन्नु पर्ने उहाँको भनाई थियो ।

कार्यक्रमका विशिष्ट अतिथि नेकपा एमालेका स्थायी कमिटी सदस्य तथा कोशी प्रदेशका पुर्व मुख्यमन्त्री शेरधन राईले नेकपा एमालेको जुनसुकै अधिवेशन विना मनमुटाव सर्वसम्मत ढंगबाट सम्पन्न भइरहेकोले कुनै गुट र समुह हावी हुन नदिनेगरी अधिवेशन सम्पन्न गर्न निर्देशन गर्नुभयो ।

उद्घाटन कार्यक्रममा बोल्दै सोलुखुम्बुबाट निर्वाचित प्रतिनिधि सभा सदस्य तथा एमालेका केन्द्रिय सदस्य मानवीर राईले ३ दशक पछि सोलुखुम्बुले केन्द्रिय राजनीतिमा स्थान पाएकोमा खुसी व्यक्त गर्दै अव यसलाई कायम राख्न सक्ने नेतृत्व सोलु जिल्ला कमिटीले पाउनुपर्ने बताउनुभयो ।

कार्यक्रममा शुभकामना मन्तव्य राख्दै कोशी प्रदेशका पुर्व सामाजिक विकास मन्त्री बुद्धिकुमार राजभण्डारीले सोलुखुम्बुको एमाले अहिले दर्बिलो अवस्थामा रहेको जनाउदै आगामी जिल्ला कमिटीबाट संगठनको विस्तारको अपेक्षा रहेको बताउनुभयो । उहाँले सर्वसम्मत नेतृत्व चयन गरि उदाहरण पेश गर्नुपर्ने बताउनुभयो ।

कार्यक्रममा बोल्दै जिल्ला स्तरीय एवं प्रदेश स्तरीय नेता तथा कार्यकर्ताहरूले एमाले सोलुखुम्बु सुदृढ बनाउन महत्वपूर्ण भूमिका जिल्ला कार्यसमितिले खेल्नु पर्ने भएकाले आट र साहस भएको नेतृत्व चयन गर्न अधिवेशन प्रतिनिधि हरूलाई आग्रह गरेका छन ।

कार्यक्रममा स्थायी कमिटी सदस्य तथा केन्द्रिय उपाध्यक्ष बादल, कोशी प्रदेशका पुर्व मुख्यमन्त्री राई, केन्द्रिय कमिटी सदस्य किशोर अधिकारी, प्रतिनिधि सभा सदस्य मानविर राई, राष्ट्रिय सभाका सदस्य सोनाम ग्याल्जेन शेर्पा तथा लेखा आयोगका सदस्य शंखर कार्की, केन्द्रिय निर्वाचन आयोगका सदस्य, प्रदेश समिति पदाधिकारी तथा सदस्यहरू लगायतको उपस्थिति रहेको थियो ।

कार्यक्रमको सभापतित्व नेकपा एमालेका जिल्ला कार्यसमिति अध्यक्ष डुफ कुमार बास्तोलाले गर्नुभएको थियो ।