डिभिजन वन कार्यालय सोलुखुम्बुले गर्यो सरोकारवालासँग छलफल तथा अन्तरक्रिया

सबिना राई, जेठ २०, सोलुखुम्बु । सब डिभिजन वन कार्यालय सोलुखुम्बुले सरोकारवालासँग छलफल तथा अन्तरक्रिया कार्यक्रम सम्पन्न गरेको छ । प्रदेश वन विकास तथा जडीबुटी प्रवद्र्धन कार्यक्रमअन्तर्गत बुधबार आयोजित कार्यक्रममा वन व्यवस्थापन, वन्यजन्तु नियन्त्रण, आगलागीका घटना तथा कार्यालयबाट प्रदान गरिने सेवाका विषयमा व्यापक छलफल गरिएको छ । कार्यक्रममा जनप्रतिनिधि, कर्मचारी, सुरक्षाकर्मी तथा सञ्चारकर्मीहरूको सहभागिता रहेको थियो ।

सहभागीहरूले जिल्लामा वन्यजन्तुबाट हुने क्षति, आगलागीका घटनाको अवस्था र त्यसको नियन्त्रणका लागि आवश्यक स्रोत–साधन तथा कार्यक्रमबारे आफ्नो जिज्ञासा, सुझाव र धारणा राखेका थिए । जनप्रतिनिधिहरूले विशेषगरी वन्यजन्तुबाट हुँदै आएको क्षति न्यूनीकरणका लागि प्रभावकारी कार्यक्रम सञ्चालन गर्न तथा आवश्यक स्रोत–साधनको व्यवस्था गर्न आग्रह गरेका थिए । त्यसैगरी सुरक्षाकर्मीहरूले जिल्लामा भालु र चितुवाको जोखिम बढ्दै गएको उल्लेख गर्दै नियन्त्रणका लागि आवश्यक सामग्रीको अभाव रहेको बताएका थिए । आगलागीका घटनामा समेत पर्याप्त उपकरण र स्रोत–साधन नहुँदा समस्या भइरहेको भन्दै व्यवस्थापनमा सहयोग गर्न डिभिजन वन कार्यालयसँग अनुरोध गरेका थिए ।

सञ्चारकर्मीहरूले आगलागीका घटनामा संलग्न व्यक्तिहरूको पहिचान तथा कारबाही प्रभावकारी रूपमा हुन नसकेको कारण यस्ता घटनाहरू दोहोरिने गरेको धारणा राखेका थिए । उनीहरूले कानुनी कारबाहीलाई थप प्रभावकारी बनाउनुपर्ने आवश्यकता औंल्याएका थिए । कार्यक्रममा उठाइएका समस्या, माग तथा सुझावहरू सम्बन्धित मन्त्रालयसम्म पुर्याउने प्रतिबद्धता डिभिजन वन कार्यालयका प्रतिनिधिहरूले व्यक्त गरेका छन् ।

कार्यक्रममा सोलुदुधकुण्ड नगरपालिका–६ का वडा अध्यक्ष तथा नगर प्रवक्ता फुर्वा ग्याल्जेन शेर्पा, वडा नं. २ का अध्यक्ष ङवाङ ठिले शेर्पा, वडा नं. ४ का अध्यक्ष युवास तामाङ, वडा नं. ३ का अध्यक्ष लाक्पा गेलु शेर्पा तथा वडा नं. ७ का कार्यवाहक अध्यक्ष भलाकाजी कार्की, डिभिजन वन कार्यालय सोलुखुम्बुका निमित्त प्रमुख मनोज कुमार महतो लगायत सुरक्षाकर्मी र सञ्चारकर्मीहरूको उपस्थिति रहेको थियो ।