सार्वजनिक स्थलमा रोपिएका विरुवा नष्ट नगर्न सोलुदुधकुण्ड नगरपालिकाको आग्रह

सबिना राई, जेठ २९, सोलुखुम्बु । सोलुखुम्बुको सोलुदुधकुण्ड नगरपालिकाले हरियाली प्रवद्र्धन कार्यक्रमअन्तर्गत सार्वजनिक स्थलमा रोपिएका विरुवाहरु नष्ट नगर्न सर्वसाधारणलाई आग्रह गरेको छ । नगरपालिकाको वातावरण शाखा प्रमुख मुना खत्री ले सार्वजनिक स्थलमा रोपिएका विरुवा भाँच्ने, उखेलेर फ्याँक्ने तथा विरुवाका गमला र अन्य सामग्रीहरू जथाभावी सार्ने कार्य बढ्दै गएकोप्रति चिन्ता व्यक्त गर्दै यस्ता गतिविधि तत्काल रोक्न आग्रह गर्नुभएको हो ।

उहाँले हरियाली नगर निर्माण नगरपालिकाको मात्र जिम्मेवारी नभई स्थानीय बासिन्दाको समेत साझा दायित्व रहेको बताउनुभयो । रोपिएका विरुवाको संरक्षण, स्याहार–सुसार र व्यवस्थापनमा स्थानीयको सक्रिय सहभागिता आवश्यक रहेको उहाँको भनाइ छ । शाखा प्रमुख खत्रीले आगामी दिनमा सार्वजनिक सम्पत्तिमा क्षति पुर्याउने तथा विरुवा नष्ट गर्ने व्यक्तिहरूको पहिचान सिसी क्यामेराको सहयोगमा गरी कानुनअनुसार कडा कारबाही गरिने चेतावनी समेत दिनुभयो ।

बिहीबार बसपार्क क्षेत्रमा रोपिएका केही विरुवाहरू मुख्य सडकमा राखिएको अवस्थामा भेटिएपछि नगर प्रहरी तथा नगरपालिकाका कर्मचारीहरूले ती विरुवाहरू पुनः सुरक्षित स्थानमा राखी संरक्षणको व्यवस्था गरेका थिए । नगरपालिकाले हरियाली प्रवद्र्धन अभियानलाई सफल बनाउन सबै नागरिकलाई रोपिएका विरुवाको संरक्षणमा सहयोग गर्न तथा सार्वजनिक सम्पत्तिको सम्मान गर्न अनुरोध गरेको छ ।