सबिना राई, जेठ २८, सोलुखुम्बु । सोलुखुम्बुको नेचासल्यान गाउँपालिका–४ निवासी तथा केदार माध्यमिक विद्यालयका पूर्व विद्यार्थी, हाल गभर्नर स्टेट युनिभर्सिटीका एसोसिएट प्रोफेसर डा. थोमस बास्तोलाले विद्यालयको आवश्यकतालाई मध्यनजर गर्दै विद्यालयसँग सिमाना जोडिएको कित्ता नं. ८९ को ८६५ वर्गमिटर क्षेत्रफल रहेको जग्गा निःशुल्क रूपमा विद्यालयलाई दान गर्नुभएको छ ।
दान गरिएको जग्गाको धनीपुर्जा विद्यालय व्यवस्थापन समिति अध्यक्ष जगनाथ बास्तोला र प्रधानाध्यापक गंगाबहादुर कार्कीलाई संयुक्त रूपमा हस्तान्तरण गरिएको छ। उक्त जग्गा विद्यालयको भौतिक पूर्वाधार विकास तथा शैक्षिक गतिविधि विस्तारमा महत्वपूर्ण योगदान पुग्ने अपेक्षा गरिएको छ। यसै अवसरमा केदार माध्यमिक विद्यालयमा अध्ययनरत आर्थिक रूपमा विपन्न तथा जेहेन्दार दुई जना विद्यार्थीलाई छात्रवृत्ति प्रदान गरिएको छ। विद्यालयका शिक्षक, कर्मचारी तथा विद्यालय व्यवस्थापन समितिको संयुक्त बैठकबाट छनोट गरिएका विद्यार्थीहरू पुष्पा नेपाली र अञ्जना कटेललाई छात्रवृत्ति स्वरूप चेक हस्तान्तरण गरिएको हो।
हिमाल एड फाउन्डेसनको डकुमेन्टेशनमा विद्यालयका पूर्व विद्यार्थीहरू डा. थोमस बास्तोला र लोमस बास्तोलाले प्रति विद्यार्थी वार्षिक १५ हजार रुपैयाँका दरले छात्रवृत्ति उपलब्ध गराउने घोषणा गर्नुभएको थियो। सोही घोषणा अनुरूप उक्त छात्रवृत्ति वितरण गरिएको हो। विद्यालयका सूचना अधिकारी सुवास भण्डारीका अनुसार यस प्रकारको सहयोगले विद्यालयको शैक्षिक तथा भौतिक विकासमा टेवा पुग्नुका साथै विपन्न तथा प्रतिभावान विद्यार्थीहरूको अध्ययनलाई थप प्रोत्साहन मिल्ने विश्वास गरिएको छ।
Discussion about this post