असार ८, सोलुखुम्बु । सोलखुम्बुको सोलुदुधकुण्ड नगरपालिका को आयोजनामा विद्यालयस्तरीय जबरजस्तीकरणी नियन्त्रण तथा रोकथाम सम्बन्धी सचेतना कार्यक्रम सञ्चालन भइरहेको छ। असार ५ गतेदेखि सुरु भएको कार्यक्रम असार २० गतेसम्म विभिन्न विद्यालयमा सञ्चालन गरिने नगरपालिकाले जनाएको छ।
कार्यक्रमको उद्देश्य विद्यार्थीहरूलाई जबरजस्तीकरणी तथा यौनजन्य हिंसाका विषयमा सचेत गराउँदै सुरक्षित वातावरण निर्माण गर्नु रहेको छ। सचेतनामूलक कार्यक्रममार्फत कानुनी व्यवस्था, आत्मसुरक्षा, जोखिमबाट बच्ने उपाय तथा घटना भएमा अपनाउनुपर्ने प्रक्रियाबारे जानकारी प्रदान गरिएको छ। हालसम्म कार्यक्रम पिके माध्यमिक विद्यालय, टाक्सीदु माध्यमिक विद्यालय तथा भिमसेनथान माध्यमिक विद्यालयमा सम्पन्न भइसकेको छ।
नगरपालिकाकी छैटौ अधिकृत अम्रिता कार्की का अनुसार कार्यक्रम बाँकी विद्यालयहरूमा समेत निरन्तर सञ्चालन गरिनेछ। उहाँले यस्ता सचेतनामूलक कार्यक्रमले विद्यार्थीहरूमा कानुनी ज्ञान, आत्मविश्वास तथा हिंसाविरुद्ध बोल्ने संस्कार विकास गर्न महत्वपूर्ण भूमिका खेल्ने बताउनुभयो। नगरपालिकाले विद्यालयस्तरबाटै लैङ्गिक हिंसा तथा जबरजस्तीकरणी नियन्त्रणका लागि सचेतना अभिवृद्धि गर्ने उद्देश्यले कार्यक्रम सञ्चालन गरेको जनाएको छ।
Discussion about this post