एकल महिलाको आर्थिक सशक्तीकरणका लागि नेचासल्यान गाउँपालिकाद्वारा बङ्गुर र बाख्रा वितरण

असार ८, सोलुखुम्बु । सोलुखुम्बुको नेचासल्यान गाउँपालिकाले ६० वर्षभन्दा कम उमेरका एकल महिलाहरूको आर्थिक सशक्तीकरण तथा जीविकोपार्जनमा टेवा पुर्याउने उद्देश्यले बङ्गुर तथा बाख्रा वितरण गरेको छ । गाउँपालिकाले सञ्चालन गरेको उक्त कार्यक्रमअन्तर्गत लक्षित वर्गका एकल महिलाहरूलाई पशुपालन व्यवसायमा आकर्षित गर्दै आयआर्जनका अवसर सिर्जना गर्ने लक्ष्य राखिएको छ ।

कार्यक्रममार्फत वितरण गरिएका बङ्गुर र बाख्राले महिलाहरूलाई स्वरोजगार बन्न सहयोग पुग्ने तथा पारिवारिक आम्दानी वृद्धि गर्न महत्वपूर्ण भूमिका खेल्ने अपेक्षा गरिएको गाउँपालिकाले जनाएको छ । स्थानीय तहको आर्थिक तथा सामाजिक विकासमा महिलाको सक्रिय सहभागिता बढाउने उद्देश्यसहित सञ्चालन गरिएको यस कार्यक्रमले आत्मनिर्भर र उद्यमशील महिला कृषकको विकासमा योगदान पुर्याउने विश्वास लिइएको छ।

पशुपालन व्यवसायमार्फत ग्रामीण क्षेत्रमा दिगो आयस्रोत निर्माण गर्दै महिलाहरूको जीवनस्तर उकास्न कार्यक्रम प्रभावकारी हुने अपेक्षा गरिएको छ।गाउँपालिकाका अनुसार लक्षित वर्गका महिलाहरूलाई आर्थिक रूपमा सबल बनाउने, उत्पादनशील क्षेत्रमा संलग्न गराउने तथा उद्यमशीलता विकास गर्ने उद्देश्यले आगामी दिनमा पनि यस्ता कार्यक्रमहरूलाई निरन्तरता दिइनेछ।

स्थानीय महिलाहरूले गाउँपालिकाको पहलप्रति खुशी व्यक्त गर्दै प्राप्त बङ्गुर र बाख्राको व्यावसायिक पालनमार्फत आफ्नो आर्थिक अवस्था सुधार गर्न थप उत्साहित भएको बताएका छन्। कार्यक्रमले ग्रामीण क्षेत्रका एकल महिलाहरूलाई आत्मनिर्भर बन्ने आधार तयार पार्ने विश्वास गरिएको छ ।