सगरमाथा दुर्घटनामा घाइते शेर्पाका लागि ८१ लाख रुपैयाँभन्दा बढी सहयोग संकलन

असार ९, सोलुखुम्बु । सगरमाथा आरोहणका क्रममा गम्भीर दुर्घटनामा परेका उच्च हिमाली गाइड दावा शेर्पा ९हिलारी० को उपचार तथा पारिवारिक पुनर्स्थापनाका लागि विश्वभरबाट उल्लेखनीय आर्थिक सहयोग जुटेको छ। आइतबारसम्म उनको सहयोगार्थ करिब ८१ लाख रुपैयाँ ९४० हजार पाउन्डभन्दा बढी० संकलन भएको बताइएको छ। दावा शेर्पा गत जेठ १५ गते एक पोलिस नागरिकलाई सगरमाथा आरोहण गराउने क्रममा गाइडको भूमिकामा थिए।

आरोहण पूरा नगरी फर्किने क्रममा उनी सगरमाथा क्षेत्रमा दुर्घटनामा परेर गम्भीर घाइते भएका थिए। ओखलढुंगाका ५७ वर्षीय दावा दुर्घटनापछि सम्पर्कविहीन बनेका थिए र छ दिनपछि, जेठ २१ गते, खुम्बु आइसफल क्षेत्रमा जीवित अवस्थामा फेला परेका थिए। उनको उपचारका लागि अन्तर्राष्ट्रिय स्तरमा सञ्चालन गरिएको ‘गोफन्डमी’ अभियानमार्फत उक्त रकम संकलन भएको हो।

अभियानमा बेलायती नागरिक स्टेफन सेलम्यान, नेपालमा अभियानका समन्वयकर्ता नुरु शेर्पा तथा दावाकी छोरी मेन्दो ल्हामु शेर्पा संलग्न छन्। अभियानका आयोजकहरूका अनुसार कोष संकलन सुरु भएको आठ दिनभित्रै निर्धारित लक्ष्यभन्दा बढी रकम जुट्न सफल भएको छ। संकलित रकम दावाको उपचार, स्वास्थ्य पुनर्स्थापना तथा उनको परिवारको आर्थिक व्यवस्थापनमा प्रयोग गरिने जनाइएको छ।

सगरमाथा क्षेत्रमा भएको दुर्घटनापछि दावाको उद्धार र उपचारको खबर सार्वजनिक भएसँगै स्वदेश तथा विदेशमा रहेका पर्वतारोहण समुदाय, शुभेच्छुक र विभिन्न सहयोगी संस्थाबाट आर्थिक तथा नैतिक समर्थन प्राप्त भइरहेको छ। अभियानकर्ताहरूले सहयोगदाताप्रति आभार व्यक्त गर्दै आगामी उपचार प्रक्रियामा समेत साथ दिन आग्रह गरेका छन्।