केपिलासगढी गाउँपालिकाको १९ औं गाउँसभा सम्पन्न, ४७ करोड ५१ लाखभन्दा बढीको बजेट सर्वसम्मत पारित

असार ९, सोलुखुम्बु । खोटाङको केपिलासगढी गाउँपालिकाको १९ औं गाउँसभा गाउँपालिका अध्यक्ष समिर राईको अध्यक्षतामा सम्पन्न भएको छ । गाउँसभाले आर्थिक वर्ष २०८३/०८४ का लागि प्रस्तुत वार्षिक नीति तथा कार्यक्रम, आर्थिक विधेयक, विनियोजन विधेयक, वार्षिक बजेट तथा विभिन्न विधेयकहरू सर्वसम्मत रूपमा पारित गरेको छ । गाउँसभाले आगामी आर्थिक वर्षका लागि कुल ४७ करोड ५१ लाख ५ हजार १ सय ७० रुपैयाँ बराबरको आय तथा व्यय अनुमान स्वीकृत गरेको छ ।

स्वीकृत बजेटअनुसार संघीय तथा प्रदेश सरकारबाट प्राप्त हुने विभिन्न अनुदान, राजस्व बाँडफाँड, आन्तरिक राजस्व तथा अन्य स्रोतहरूबाट उक्त रकम संकलन हुने अनुमान गरिएको छ। आयतर्फ संघीय सरकारको वित्तीय समानीकरण अनुदानबाट ८ करोड १९ लाख रुपैयाँ, राजस्व बाँडफाँडबाट ८ करोड ८६ लाख ६९ हजार रुपैयाँ, संघीय सशर्त चालु अनुदानबाट १९ करोड ४४ लाख रुपैयाँ तथा संघीय सशर्त पुँजीगत अनुदानबाट १ करोड २९ लाख रुपैयाँ प्राप्त हुने अनुमान गरिएको छ।

त्यस्तै संघीय समपूरक अनुदान २ करोड ३२ लाख, विशेष अनुदान २ करोड ५० लाख, प्रदेश समानीकरण अनुदान ६९ लाख २६ हजार, प्रदेश सशर्त चालु अनुदान १५ लाख ३६ हजार तथा प्रदेश सशर्त पुँजीगत अनुदान ४५ लाख ९८ हजार रुपैयाँ रहनेछ। यसैगरी सवारी कर बाँडफाँडबाट ६९ लाख २६ हजार १७० रुपैयाँ, घरजग्गा रजिष्ट्रेसन शुल्कबाट ५ लाख रुपैयाँ, प्रदेश समपूरक अनुदानबाट १ करोड रुपैयाँ, आन्तरिक राजस्वबाट ३५ लाख ५० हजार रुपैयाँ तथा अन्य स्रोतबाट १ करोड ५० लाख रुपैयाँ प्राप्त हुने अनुमान गरिएको छ।

व्ययतर्फ कुल बजेटमध्ये १७ करोड १२ लाख ५१ हजार रुपैयाँ पुँजीगत खर्च र ३० करोड ३८ लाख ५४ हजार १७० रुपैयाँ चालु खर्चका लागि विनियोजन गरिएको छ । क्षेत्रगत बजेट विनियोजनअनुसार आर्थिक विकासतर्फ ६ करोड १ लाख २६ हजार ८६० रुपैयाँ, सामाजिक विकासतर्फ २२ करोड ७५ लाख ६२ हजार ५०० रुपैयाँ, पूर्वाधार विकासतर्फ ९ करोड १५ लाख ७३ हजार ६१५ रुपैयाँ, सुशासन तथा अन्तरसम्बन्धित क्षेत्रतर्फ ८९ लाख ५० हजार ५०० रुपैयाँ तथा कार्यालय सञ्चालन र प्रशासनिक खर्चतर्फ ८ करोड ६८ लाख ८४ हजार ६९५ रुपैयाँ विनियोजन गरिएको छ।

उपक्षेत्रगत रूपमा शिक्षा क्षेत्रमा सबैभन्दा बढी १६ करोड ८५ लाख ६८ हजार ५१० रुपैयाँ बजेट विनियोजन गरिएको छ। स्वास्थ्य क्षेत्रमा ३ करोड ५६ लाख ८५ हजार ६६८ रुपैयाँ, खानेपानी क्षेत्रमा २ करोड ९१ लाख १२ हजार ५०० रुपैयाँ, सिँचाइ क्षेत्रमा १७ लाख ५० हजार रुपैयाँ, विपद् व्यवस्थापनका लागि १० लाख रुपैयाँ, पर्यटन क्षेत्रमा १ करोड ६१ लाख ११ हजार रुपैयाँ तथा कृषि क्षेत्रमा ४ करोड ३७ लाख ५१ हजार ६४० रुपैयाँ बजेट विनियोजन गरिएको छ।

गाउँपालिका अध्यक्ष समिर राईले आगामी आर्थिक वर्षको नीति तथा कार्यक्रमले कृषि, शिक्षा, स्वास्थ्य, पर्यटन तथा पूर्वाधार विकासलाई प्राथमिकतामा राख्दै समृद्ध र आत्मनिर्भर केपिलासगढी निर्माणमा टेवा पुग्ने विश्वास व्यक्त गरेका छन् ।