सोलुखुम्बुमा अत्याधुनिक ‘सोलुखुम्बु जिम एण्ड फिटनेस सेन्टर’ सञ्चालनमा

सबिना राई, सोलुखुम्बु, असार ११ । हिमाली जिल्ला सोलुखुम्बुको सदरमुकाममा आधुनिक सुविधा सम्पन्न ‘सोलुखुम्बु जिम एण्ड फिटनेस सेन्टर’ सञ्चालनमा आएको छ । बिहीबार आयोजित एक कार्यक्रमका बीच सोलुदुधकुण्ड नगरपालिकाका मेयर नाम्गेल जाङ्बु शेर्पाले रिबन काटेर फिटनेस सेन्टरको औपचारिक उद्घाटन गर्नुभएको छ ।

उद्घाटनपछि नगर प्रमुख शेर्पाले सेन्टरमा जडान गरिएका अत्याधुनिक व्यायाम उपकरण तथा जिम मेसिनहरूको अवलोकन गर्दै उपलब्ध सुविधाबारे जानकारी लिनुभएको थियो । कार्यक्रमलाई सम्बोधन गर्दै उहाँले फिटनेस सेन्टर केवल शारीरिक तन्दुरुस्ती कायम गर्ने स्थान मात्र नभई युवाहरूलाई सकारात्मक सोच, अनुशासन र स्वस्थ जीवनशैलीतर्फ प्रेरित गर्ने महत्वपूर्ण माध्यम भएको बताउनुभयो ।

साथै, स्वस्थ नागरिक निर्माणका लागि यस्ता पूर्वाधारले महत्वपूर्ण भूमिका खेल्ने उहाँको भनाइ थियो । उद्घाटन कार्यक्रममा स्थानीय जनप्रतिनिधि, उद्योगी–व्यवसायी, युवा तथा खेलप्रेमीहरूको उल्लेख्य उपस्थिति रहेको थियो । सहभागीहरूले सदरमुकाममै आधुनिक जिम तथा फिटनेस सेवा उपलब्ध हुनु सकारात्मक उपलब्धि भएको उल्लेख गर्दै यसले जिल्लावासीलाई स्वास्थ्यप्रति थप सचेत र सक्रिय बन्न प्रेरित गर्ने विश्वास व्यक्त गरेका छन् ।