थुलुङ दुधकोशीमा आधारभूत तहका शिक्षकका लागि क्षमता अभिवृद्धि तालिम सुरु

सोलुखुम्बु, असार १४ । सोलुखुम्बुको थुलुङ दुधकोशी गाउँपालिकामा आधारभूत तह (कक्षा १–५) मा अध्यापनरत शिक्षकहरूको क्षमता अभिवृद्धिका लागि दुईदिने तालिम सुरु भएको छ । आईतबारबाट थुलुङ दुधकोशी गाउँपालिका शिक्षा, युवा तथा खेलकुद शाखाको आयोजनामा सञ्चालन भएको तालिमको उद्घाटन गाउँपालिका कार्यबाहक अध्यक्ष सबिता राईले गर्नुभएको हो । कार्यक्रम शिक्षा शाखा प्रमुख कुमार खड्काको अध्यक्षतामा सम्पन्न भएको थियो ।

उद्घाटन समारोहलाई सम्बोधन गर्दै कार्यबाहक अध्यक्ष राईले गाउँपालिकाले विगतदेखि नै शिक्षालाई उच्च प्राथमिकतामा राख्दै आवश्यक बजेट विनियोजन गर्दै आएको बताउनुभयो । उहाँले तालिमबाट शिक्षकहरूमा कक्षा १–५ को निरन्तर मूल्यांकन प्रणाली तथा एकीकृत पाठ्यक्रम कार्यान्वयनसम्बन्धी अन्योल हट्ने विश्वास व्यक्त गर्नुभयो । साथै, तालिममा सिकेका ज्ञान र सीपलाई विद्यालयमा अन्य शिक्षकहरूसँग साझा गर्दै व्यवहारमा लागू गर्न आग्रह गर्नुभयो ।

तालिमको सहजीकरण रीड नेपालका शिक्षा विकास संयोजक तथा शिक्षा तालिम केन्द्र सुनसरीका रोस्टर प्रशिक्षक केशवदेव गिरी र रोस्टर प्रशिक्षक तथा जीवनज्योति माध्यमिक विद्यालय, नेलेका शिक्षक जनककुमार थापाले गरिरहनुभएको छ ।

प्रशिक्षक केशवदेव गिरीका अनुसार तालिममा एकीकृत पाठ्यक्रमको अवधारणा, विद्यालयमा पाठ्यक्रम कार्यान्वयनका चुनौती, एकीकृत शिक्षण योजना निर्माण, व्यवहारकुशल सीप विकास तथा कक्षा १–५ को मूल्यांकन प्रणालीलगायत विषयमा प्रशिक्षण प्रदान गरिनेछ । शिक्षा शाखाका नविन्द्र राईका अनुसार तालिममा गाउँपालिकाका वडा नं. १, २, ३, ६, ७ र ८ का विभिन्न विद्यालयका २६ जना शिक्षकहरूको सहभागिता रहेको छ । तालिम दुई दिनसम्म सञ्चालन हुनेछ ।