सोलुखुम्बु, असार १४ । हिमाली जिल्ला सोलुखुम्बुमा एचआईभी/एड्ससम्बन्धी लाञ्छना तथा भेदभाव न्यूनीकरण गर्ने उद्देश्यले सरोकारवालासँग अभिमुखीकरण कार्यक्रम सम्पन्न भएको छ। जिल्ला स्वास्थ्य कार्यालय सोलुखुम्बुको आयोजनामा आइतबार सम्पन्न कार्यक्रममा एचआईभीरएड्सको रोकथाम, परीक्षण, उपचार तथा उपलब्ध स्वास्थ्य सेवाका विषयमा छलफल गरिएको थियो।
साथै, एचआईभी संक्रमित व्यक्तिप्रति समाजमा हुने लाञ्छना र भेदभाव अन्त्य गर्न सबै पक्षको भूमिका आवश्यक रहेको विषयमा सहभागीबीच अन्तरक्रिया भएको थियो। कार्यक्रममा जिल्ला स्वास्थ्य कार्यालय सोलुखुम्बुका प्रमुख जीवनप्रसाद चौलागाईंले घरपरिवार, समुदाय तथा सरोकारवाला सबै पक्ष सचेत र जिम्मेवार भए एचआईभी संक्रमणको जोखिम न्यूनीकरण गर्न सकिने बताउनुभयो। उहाँले एचआईभी संक्रमित व्यक्तिलाई कुनै पनि बहानामा विभेद वा लाञ्छना गर्नु मानवअधिकारविपरीत हुने भएकाले सम्मानजनक व्यवहार गर्न सबैलाई आग्रह गर्नुभयो।
त्यसैगरी जिल्ला अस्पताल फाप्लुका प्रमुख डा. दिनेश कुमार मण्डलले एचआईभीरएड्सको वर्तमान अवस्थाबारे जानकारी दिँदै चालु आर्थिक वर्षमा सोलुखुम्बु जिल्लामा दुई जनामा एचआईभी संक्रमण पुष्टि भएको जानकारी दिनुभयो। उहाँले समयमै परीक्षण, उपचार तथा जनचेतनाको अभावका कारण संक्रमण फैलिने जोखिम रहने भएकाले सचेतना अभिवृद्धि आवश्यक रहेको उल्लेख गर्नुभयो।
अभिमुखीकरण कार्यक्रममा स्वास्थ्यकर्मी, सञ्चारकर्मी तथा अन्य सरोकारवालाको सहभागिता रहेको थियो। कार्यक्रममा एचआईभीरएड्ससम्बन्धी गलत धारणा हटाउँदै संक्रमित व्यक्तिप्रति सम्मानजनक व्यवहार र समान अवसर सुनिश्चित गर्न सबैको साझा प्रयास आवश्यक रहेकोमा जोड दिइएको थियो।
Discussion about this post