सोलुखुम्बुमा ७९ वर्षीया वृद्धाको शङ्कास्पद मृत्युः हत्या आशंकामा आफ्नै छोरा पक्राउ

सबिना राई, असार १५, सोलुखुम्बु । सोलुखुम्बुको सोलुदूधकुण्ड नगरपालिका वडा नम्बर ११ बुस्तिङमा एक ७९ वर्षीया वृद्धाको शङ्कास्पद मृत्यु भएको छ । घटनामा संलग्न रहेको आशङ्कामा प्रहरीले मृतकका आफ्नै छोरालाई नियन्त्रणमा लिएको छ । जिल्ला प्रहरी कार्यालय सोलुखुम्बुका प्रहरी निरीक्षक मौसम तामाङका अनुसार असार १२ गते राती अन्दाजी २१ः१५ बजेको समयमा स्थानीय याक्पु शेर्पाकी श्रीमती ७९ वर्षीया रिन्जी शेर्पाको मृत्यु भएको थियो ।

सुरुमा घरमा एक्लै बस्दै आएकी वृद्धाको इलेक्ट्रिक सर्ट भई तारमा आगो लाग्दा जलेर मृत्यु भएको भनी प्रहरीमा सूचना पुगेको थियो । घटनाको सूचना पाएलगत्तै प्रहरी टोलीले घटनास्थल पुगेर सुक्ष्म अनुसन्धान सुरु गरेको थियो । अनुसन्धानका क्रममा घटनाको प्रकृति निकै शङ्कास्पद देखिएको प्रहरीले जनाएको छ । मृतकको टाउको तथा हातमा धारिलो हतियारको गम्भीर चोट भेटिएपछि प्रहरीले यसलाई कर्तव्य ज्यान (हत्या) को रूपमा अघि बढाएको हो ।

प्रहरीले घटनास्थलबाट वारदातमा प्रयोग भएको १ थान खुकुरी समेत बरामद गरेको छ । घटनामा संलग्न रहेको आशङ्कामा मृतक रिन्जी शेर्पाका साहिला छोरा, ४२ वर्षीय आङ दावा शेर्पालाई प्रहरीले पक्राउ गरेको छ । हाल आङ दावा शेर्पालाई नियन्त्रणमा लिई जिल्ला अदालत सोलुखुम्बुबाट दिन ५ (पाँच) को म्याद थप गरी घटनाको सम्बन्धमा थप अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ ।