सबिना राई, सोलुखुम्बु, असार १५ । सोलुखुम्बुको सोलुदुधकुण्ड नगरपालिका–५ स्थित जन जागृति माध्यमिक विद्यालयमा सामुदायिक विद्यालयमा विज्ञान विषय प्रवर्धन कार्यक्रमअन्तर्गत विज्ञान प्रदर्शनी कार्यक्रम सम्पन्न भएको छ । “जिज्ञासाले नै सिर्जनशीलता जगाउँछ“ भन्ने नारासहित सोमबार आयोजित प्रदर्शनीमा विद्यार्थीहरूले आफैं निर्माण गरेका रकेट उडाउनुका साथै विज्ञानका विविध प्रयोगात्मक सामग्री, मोडल तथा नवीनतम आविष्कारहरू प्रदर्शन गरेका थिए ।
विद्यालय व्यवस्थापन समितिका अध्यक्ष तथा वडा नम्बर ५ का वडा अध्यक्ष मिङमार तामाङको अध्यक्षता तथा जिल्ला समन्वय समिति सोलुखुम्बुका प्रमुख कृष्णप्रसाद निरौलाको प्रमुख आतिथ्यतामा सम्पन्न कार्यक्रममा जनप्रतिनिधि, शिक्षक, अभिभावक तथा स्थानीयवासीको उल्लेख्य सहभागिता रहेको थियो । कार्यक्रमलाई सम्बोधन गर्दै प्रमुख अतिथि कृष्णप्रसाद निरौलाले वर्तमान युगमा विज्ञान शिक्षा अपरिहार्य रहेको उल्लेख गर्दै विद्यार्थीहरूमा वैज्ञानिक सोच, जिज्ञासा र अनुसन्धानप्रतिको रुचि विकास गर्न यस्ता प्रदर्शनी प्रभावकारी माध्यम हुने बताउनुभयो । उहाँले विद्यालयमा विज्ञान, प्रविधि, अनुसन्धान तथा नवप्रवर्तनको वातावरण निर्माण गर्न यस्ता कार्यक्रमलाई निरन्तरता दिन आवश्यक रहेकोमा जोड दिनुभयो ।
सोलुदुधकुण्ड नगरपालिकाकी उपमेयर गान्धिमाया तामाङले विद्यार्थीहरूले प्रस्तुत गरेका सिर्जनात्मक, प्रयोगात्मक तथा वैज्ञानिक दृष्टिकोणले भरिपूर्ण परियोजनाको प्रशंसा गर्दै विज्ञान र प्रविधिप्रति विद्यार्थीहरूको बढ्दो चासो उत्साहजनक रहेको बताउनुभयो । उहाँले यस्ता कार्यक्रमले भविष्यमा वैज्ञानिक सोचको विकास र नवप्रवर्तनलाई थप प्रोत्साहन गर्ने विश्वास व्यक्त गर्नुभयो ।
कार्यक्रमका अध्यक्ष तथा वडा नम्बर ५ का वडा अध्यक्ष मिङमार तामाङले विद्यार्थीहरूको उज्ज्वल भविष्यको शुभकामना व्यक्त गर्दै विज्ञानको युगमा जन जागृति माध्यमिक विद्यालयका विद्यार्थीहरूले देखाएको मेहनत, लगनशीलता र सिर्जनशीलताको उच्च प्रशंसा गर्नुभयो । विज्ञान प्रदर्शनीमार्फत विद्यार्थीहरूले आफ्नो सिकाइलाई व्यवहारमा उतार्दै प्रयोगात्मक ज्ञान, अनुसन्धान क्षमता र नवप्रवर्तनको सोच प्रस्तुत गरेका थिए । विद्यालयले यस्ता कार्यक्रमले विद्यार्थीहरूमा विज्ञानप्रतिको आकर्षण बढाउनुका साथै सिर्जनशील र अनुसन्धानमुखी शिक्षाको विकासमा महत्वपूर्ण योगदान पुग्ने विश्वास व्यक्त गरेको छ ।
Discussion about this post