जिल्ला खेलकुद विकास समिति सोलुखुम्बुको नवनियुक्त अध्यक्ष र उपाध्यक्षद्वारा पदभार ग्रहण

सोलुखुम्बु, असार १५ । जिल्ला खेलकुद विकास समिति सोलुखुम्बुका नवनियुक्त अध्यक्ष अर्जुन रोक्का र उपाध्यक्ष कृष्णा तामाङले सोमबार औपचारिक रूपमा पदभार ग्रहण गर्नुभएको छ । जिल्ला समन्वय समितिका प्रमुख कृष्ण प्रसाद निरौलाको प्रमुख आतिथ्यतामा आयोजित कार्यक्रममा अध्यक्ष रोक्का र उपाध्यक्ष तामाङले पदभार ग्रहण गर्नुभएको हो ।

कार्यक्रमलाई सम्बोधन गर्दै जिल्ला समन्वय समितिका प्रमुख निरौलाले नवनियुक्त नेतृत्वले जिल्लाको खेलकुद क्षेत्रको विकास र प्रवद्र्धनमा महत्वपूर्ण भूमिका निर्वाह गर्ने विश्वास व्यक्त गर्नुभयो । उहाँले सबै सरोकारवालासँग समन्वय गर्दै खेलकुद गतिविधिलाई थप प्रभावकारी बनाउन आग्रह गर्नुभयो । पदभार ग्रहणपछि बोल्दै अध्यक्ष अर्जुन रोक्काले जिल्लामा समयमै सञ्चालन हुन नसकेको राष्ट्रपति रनिङ शिल्ड प्रतियोगितालाई आफ्नो कार्यकालको प्राथमिकतामा राख्ने बताउनुभयो। साथै, खेलकुद प्रशिक्षकहरूको व्यवस्थापन, खेलाडी उत्पादन तथा जिल्लाको खेलकुद पूर्वाधार विकासमा विशेष ध्यान दिने प्रतिबद्धता व्यक्त गर्नुभयो ।

त्यस्तै उपाध्यक्ष कृष्णा तामाङले जिल्लाको समग्र खेलकुद विकासका लागि सबै पक्षको साथ, सहयोग र समन्वय आवश्यक रहेको उल्लेख गर्दै सामूहिक प्रयासबाट खेलकुद क्षेत्रलाई नयाँ उचाइमा पु¥याउन सकिने विश्वास व्यक्त गर्नुभयो। कार्यक्रममा जिल्ला खेलकुद विकास समिति सोलुखुम्बुका प्रमुख केशव प्रसाद कटेलले नवनियुक्त अध्यक्ष तथा उपाध्यक्षलाई स्वागत गर्दै आगामी दिनमा जिल्लाको खेलकुद विकासका लागि सहकार्य गर्दै अघि बढ्ने प्रतिबद्धता जनाउनुभयो। कार्यक्रममा विभिन्न सरोकारवाला निकायका प्रतिनिधि तथा खेलकुदकर्मीहरूको उपस्थिति रहेको थियो ।