सोलुखुम्बु, असार १७ । सोलुखुम्बुको थुलुङ दूधकोशी गाउँपालिका–८ मा विश्वविद्यालय तथा अनुसन्धान केन्द्रको समन्वयमा स्थलगत प्रविधि प्रचार–प्रसार कार्यक्रम सम्पन्न भएको छ । कृषि विकास निर्देशनालय, कोशी प्रदेश, विराटनगरको आयोजनामा असार १५ गते उक्त कार्यक्रम सम्पन्न भएको हो । आर्थिक वर्ष २०८२/०८३ को स्वीकृत वार्षिक कार्यक्रमअन्तर्गत आयोजित कार्यक्रममा कृषकहरूलाई आधुनिक कृषि प्रविधि प्रयोगमा प्रोत्साहन गर्ने उद्देश्यले विभिन्न कृषि सामग्री तथा औजार हस्तान्तरण गरिएको छ।
कृषि विकास निर्देशनालयका कृषि अर्थविज्ञ गणेश खत्रीका अनुसार कृषकलाई ४ थान पोर्टेबल इलेक्ट्रिक पावर स्प्रेयर, ४ थान न्यापस्याक इलेक्ट्रिक स्प्रेयर, कोनिका २५० प्याकेट, प्रोटिन बेट २ लिटर, इमिडाक्लोप्रिड ६० पिस, रोजर ५७ पिस, बोन मिल २५ केजी, पीजीआर ५० थान, माइक्रोन्युट्रिएन्ट ५० थान, ५ थान सिकेचर तथा ५ थान प्रुनिङ उपकरण वितरण गरिएको छ ।
निर्देशनालयका अनुसार विश्वविद्यालय र अनुसन्धान केन्द्रको समन्वयमा सञ्चालन गरिएको उक्त कार्यक्रमले कृषकलाई आधुनिक कृषि प्रविधिको प्रयोग तथा उत्पादन वृद्धि गर्न सहयोग पुग्ने अपेक्षा गरिएको छ । कृषि सामग्री प्राप्त गरेपछि स्थानीय कृषकहरूले खुसी व्यक्त गर्दै यस्ता कार्यक्रमले कृषि उत्पादन र व्यवसायिक खेतीलाई थप टेवा पुग्ने विश्वास व्यक्त गरेका छन् ।
कार्यक्रममा थुलुङ दूधकोशी गाउँपालिका–८ का वडा अध्यक्ष राजेश राई, कृषि विकास निर्देशनालयका कृषि अर्थविज्ञ गणेश खत्री, वरिष्ठ बागवानी विकास अधिकृत टोनी बर्देबा, गौरादह कृषि क्याम्पसका उपप्राध्यापक सन्तोष खनाल, नेपाल कृषि अनुसन्धान परिषद् (नार्क) का प्राविधिक अधिकृत सुरेश प्रसाद यादव, कृषि ज्ञान केन्द्र सोलुखुम्बुका प्रमुख दुर्गा बहादुर तिरुवा तथा कृषि ज्ञान केन्द्रका अन्य कर्मचारीहरूको उपस्थिती रहेको थियो ।
Discussion about this post