माप्य दुधकोशीमा अपाङ्गता भएका व्यक्तिलाई उपचार सहयोग, व्यवसाय अनुदान र शैक्षिक सामग्री वितरण

आसर १६, सोलुखुम्बु । सोलुखुम्बुको माप्य दुधकोशी गाउँपालिकामा सञ्चालित अपाङ्गता रोकथाम तथा पुनःस्थापना कार्यक्रम अन्तर्गत २० जना अपाङ्गता भएका व्यक्तिलाई स्वास्थ्य उपचारका लागि १ लाख ७६ हजार रुपैयाँ आर्थिक सहयोग प्रदान गरिएको छ। सामाजिक विकास मन्त्रालय, कोशी प्रदेश सरकार, माप्य दुधकोशी गाउँपालिका र करुणा फाउण्डेसन नेपालको त्रिपक्षीय लागत साझेदारीमा सञ्चालित कार्यक्रममार्फत उपचार सहयोग उपलब्ध गराइएको हो।

यससँगै, अपाङ्गता भएका व्यक्तिहरूको आर्थिक सशक्तीकरणलाई लक्षित गर्दै व्यवसाय विस्तार कार्यक्रम अन्तर्गत मौरीपालन व्यवसायका लागि २० हजार रुपैयाँ तथा फुर्का व्यवसाय सञ्चालनका लागि १५ हजार रुपैयाँ अनुदान प्रदान गरिएको छ। कार्यक्रम अन्तर्गत नै अपाङ्गता भएका १७ जना विद्यार्थीलाई आवश्यक शैक्षिक सामग्री वितरण गरिएको गाउँपालिका उपाध्यक्ष गौरव राईले जानकारी दिनुभयो।

उहाँका अनुसार यस्ता कार्यक्रमले अपाङ्गता भएका व्यक्तिहरूको स्वास्थ्य, शिक्षा तथा जीविकोपार्जनमा सकारात्मक टेवा पुर्याएको छ। यसैबीच, गाउँपालिकाले सञ्चालन गरेको जलवायु परिवर्तन तथा विपद् व्यवस्थापन कार्यक्रम पनि सफलतापूर्वक सम्पन्न भएको जनाएको छ। स्थानीय समुदायको सहभागितामा सञ्चालन गरिएको उक्त कार्यक्रमले विपद् जोखिम न्यूनीकरण तथा जलवायु परिवर्तनका असर न्यूनीकरणमा जनचेतना अभिवृद्धि गर्न सहयोग पुगेको गाउँपालिकाको विश्वास रहेको छ।