माप्य दूधकोशीका बालविकास शिक्षकलाई पाँचदिने पुनर्ताजगी तालिम

सोलुखुम्बु, असार १६ । सोलुखुम्बुको माप्य दूधकोशी गाउँपालिकामा कार्यरत बालविकास शिक्षकहरूका लागि आयोजित पाँचदिने पुनर्ताजगी तालिम सम्पन्न भएको छ। चाइल्ड एड नेटवर्कको आर्थिक सहयोग तथा सेतो गुराँस राष्ट्रिय बाल विकास सेवाद्वारा सञ्चालित ‘ईसीईडी हार्मोनी’ कार्यक्रमअन्तर्गत सञ्चालन गरिएको तालिम मंगलबार सल्लेरीमा सम्पन्न भएको हो।

तालिममा गाउँपालिकाभित्रका विभिन्न विद्यालयमा कार्यरत २७ जना बालविकास शिक्षकहरूको सहभागिता रहेको थियो। प्रारम्भिक बाल शिक्षाको गुणस्तर अभिवृद्धि गर्नुका साथै शिक्षकहरूको ज्ञान, सीप र व्यावसायिक क्षमता विकास गर्ने उद्देश्यले तालिम आयोजना गरिएको आयोजकले जनाएको छ। तालिमको सहजीकरण सेतो गुराँस राष्ट्रिय बाल विकास सेवाका वरिष्ठ तालिम अधिकृत बुद्धिबल थापा मगरले गर्नुभएको थियो।

उहाँले प्रारम्भिक बाल सिकाइ तथा विकास मापदण्डअनुसार बालमैत्री सिकाइ वातावरण निर्माण, बालकेन्द्रित शिक्षण विधि, प्रभावकारी कक्षा व्यवस्थापन तथा बालबालिकाको समग्र विकाससँग सम्बन्धित विषयमा प्रशिक्षण दिनुभएको थियो। सेतो गुराँस राष्ट्रिय बाल विकास सेवाका माप्य दूधकोशी गाउँपालिकाका मेन्टर प्रदीप नाछिरीङ राईका अनुसार तालिममा सहभागी शिक्षकहरूले सिकेका ज्ञान र सीपलाई विद्यालयमा प्रभावकारी रूपमा कार्यान्वयन गर्ने प्रतिबद्धता व्यक्त गरेका छन्। यस्ता पुनर्ताजगी तालिमले बालविकास शिक्षाको गुणस्तर सुधार गर्न र प्रारम्भिक बाल शिक्षालाई थप प्रभावकारी बनाउन महत्वपूर्ण भूमिका खेल्ने उहाँको विश्वास छ।