विद्यालय शिक्षालाई कृषिसँग जोड्दै ताप्ली गाउँपालिकाद्वारा कृषि सामग्री सहयोग

असार १६, सोलुखुम्बु । उदयपुरको ताप्ली गाउँपालिकाले विद्यालय शिक्षालाई कृषिसँग जोड्दै विद्यार्थीमा व्यावहारिक कृषि सीप विकास गर्ने उद्देश्यका साथ विद्यालय कृषि सचेतना कार्यक्रम सञ्चालन गरेको छ । कार्यक्रममार्फत आत्मनिर्भर विद्यार्थी उत्पादन गर्नुका साथै कृषि क्षेत्रमा दक्ष र व्यवहारिक ज्ञानयुक्त जनशक्ति तयार पार्ने लक्ष्य राखिएको गाउँपालिकाले जनाएको छ ।

यसैक्रममा ताप्ली गाउँपालिका–५, रुपाटारस्थित पञ्चावती आधारभूत विद्यालय (कक्षा १–८) लाई “एक विद्यालय, एक करेसाबारी“ कार्यक्रम सञ्चालनका लागि आवश्यक कृषि सामग्री हस्तान्तरण गरिएको छ । विद्यालय दिवा खाजा कार्यक्रमलाई समेत सहयोग पुग्ने गरी तरकारी खेती विस्तार गर्न टनेल, ड्रिप सिँचाइ सेट तथा विभिन्न तरकारीका बीउबिजन उपलब्ध गराइएको गाउँपालिका अध्यक्ष ढुङ्गराज विश्वकर्माले जानकारी दिनुभयो ।

उहाँका अनुसार विद्यालयमा करेसाबारी सञ्चालन भएपछि विद्यार्थीले कक्षाकोठामा सिकेको ज्ञानलाई व्यवहारमा उतार्ने अवसर पाउनेछन् । साथै विद्यालयमै उत्पादन हुने ताजा तरकारी दिवा खाजा कार्यक्रममा प्रयोग गर्न सकिने भएकाले विद्यार्थीको पोषणमा समेत सकारात्मक योगदान पुग्ने विश्वास व्यक्त गर्नुभयो ।

कृषि सामग्री बुझ्दै पञ्चावती आधारभूत विद्यालय परिवारले गाउँपालिकाको सहयोगप्रति आभार व्यक्त गरेको छ । विद्यालयले आगामी दिनमा पनि यस्ता शैक्षिक तथा कृषि प्रवद्र्धनका कार्यक्रमलाई निरन्तरता दिँदै थप सहयोग र सहकार्यको अपेक्षा गरेको छ ।