असार १६, साेलुखुम्बु । सोलु हाइड्रोपावर लिमिटेडले आयोजना क्षेत्रमा मनसुनजन्य विपद्को पूर्वतयारीलाई प्रभावकारी बनाउने उद्देश्यले बाढी, पहिरो तथा आपतकालीन उद्धारसम्बन्धी अभ्यास (Flood, Landslide and Emergency Evacuation Drill) सञ्चालन गरेको छ।
मनसुनका समयमा हुन सक्ने प्राकृतिक विपद्का घटनामा कर्मचारी तथा सम्बन्धित निकायबीचको तयारी, समन्वय र उद्धार कार्यलाई प्रभावकारी बनाउने उद्देश्यले उक्त अभ्यास गरिएको कम्पनीले जनाएको छ।
अभ्यासका क्रममा आपतकालीन सूचना प्रवाह, जोखिमयुक्त क्षेत्रबाट सुरक्षित स्थानमा स्थानान्तरण, खोज तथा उद्धार, प्राथमिक उपचार, सञ्चार व्यवस्थापन तथा सम्बन्धित पक्षबीच समन्वयका विभिन्न पक्षहरूको व्यावहारिक अभ्यास गरिएको थियो।
कम्पनीका अनुसार यस्ता अभ्यासले विपद्का बेला कर्मचारीको तत्परता, उद्धार क्षमता र समन्वय प्रणालीलाई सुदृढ बनाउन सहयोग पुग्ने विश्वास गरिएको छ। साथै, विपद् व्यवस्थापनका क्रममा अपनाउनुपर्ने सुरक्षा मापदण्ड र कार्यविधिबारे सहभागीलाई व्यवहारिक जानकारीसमेत प्रदान गरिएको थियो।
मनसुनको समयमा बाढी, पहिरो तथा अन्य प्राकृतिक विपद्को जोखिम बढ्ने भएकाले समयमै पूर्वतयारी र नियमित अभ्यासले सम्भावित क्षति न्यूनीकरण तथा जनधनको सुरक्षा गर्न महत्वपूर्ण भूमिका खेल्ने सरोकारवालाले बताएका छन्।
Discussion about this post