उत्कृष्ट बाउसे र रोपारलाई सम्मान गरी सोलुमा २३औँ राष्ट्रिय धान दिवस मनाईयो

सोलुखुम्बु, असार १६ । सोलुखुम्बुको थुलुङ दुधकोशी गाउँपालिका–८ मा १० वटा आधारमा मूल्याङ्कन गरी उत्कृष्ट एक जना बाउसे र पाँच जना रोपारलाई सम्मान तथा पुरस्कृत गर्दै २३औँ राष्ट्रिय धान दिवस मनाइएको छ । कृषि ज्ञान केन्द्र सोलुखुम्बुको आर्थिक वर्ष २०८२/८३ को स्वीकृत वार्षिक कार्यक्रमअन्तर्गत “जलवायुमैत्री प्रविधि र धानमा आत्मनिर्भरता, समृद्धिको आधार” भन्ने मूल नारासहित आयोजना गरिएको कार्यक्रममा धान रोपाइँसँगै उत्कृष्ट बाउसे र रोपार छनोट गरी सम्मान गरिएको हो ।

खेतमा देखाइएको दक्षता, कार्यकुशलता, अनुशासन, सहभागिता तथा अन्य १० वटा निर्धारित आधारमा मूल्याङ्कन गरी उत्कृष्ट सहभागीलाई पुरस्कार प्रदान गरिएको आयोजकले जनाएको छ । रोपाई कार्यक्रममा कृषि ज्ञान केन्द्र सोलुखुम्बुका प्रमुख दुर्गा बहादुर तिरुवा, थुलुङ दुधकोशी गाउँपालिका–८ का वडा अध्यक्ष राजेश राई, कृषि अर्थविज्ञ, बागबानी विकास अधिकृत, कृषि प्राविधिक, कर्मचारी तथा स्थानीय किसानहरूको उल्लेखनीय उपस्थिती रहेको थियो ।

कार्यक्रमको मुख्य आकर्षणका रूपमा १० वटा मूल्याङ्कनका आधारमा उत्कृष्ट एक जना बाउसे र पाँच जना रोपारलाई सम्मान तथा पुरस्कार वितरण गरिएको थियो, जसले किसानको श्रम, सीप र योगदानको उच्च सम्मान गरेको सहभागीहरूले बताएका छन् ।