शिक्षाको गुणस्तर सुधारमा थुलुङ दुधकोशीको पहल – रीड नेपालकाे सहर्कायमा २६ शिक्षकलाई क्षमता अभिवृद्धि तालिम

असार १५, साेलुखुम्बु ।   थुलुङ दुधकोशी गाउँपालिकाले आधारभूत तह (कक्षा १–५) मा अध्यापनरत शिक्षकहरूको पेशागत दक्षता अभिवृद्धि गर्ने उद्देश्यले सञ्चालन गरेको दुईदिने एकीकृत पाठ्यक्रम कार्यान्वयन तथा मूल्याङ्कन सम्बन्धी क्षमता अभिवृद्धि तालिम सम्पन्न गरेको छ।

शिक्षा, युवा तथा खेलकुद शाखाको आयोजनामा आइतबारदेखि सञ्चालन भएको तालिम सोमबार सम्पन्न भएको हो। तालिममा कक्षा १–३ को एकीकृत पाठ्यक्रम प्रभावकारी कार्यान्वयन तथा कक्षा ४–५ को मूल्याङ्कन प्रणालीबारे शिक्षकहरूलाई व्यवहारिक ज्ञान र सीप प्रदान गरिएको थियो।

समापन कार्यक्रममा प्रमुख अतिथिका रूपमा बोल्दै गाउँपालिकाकी कार्यबाहक अध्यक्ष सवीता राईले गाउँपालिकाले विगतदेखि नै शिक्षालाई उच्च प्राथमिकतामा राख्दै आवश्यक बजेट विनियोजन गर्दै आएको बताउनुभयो। उहाँले तालिमले कक्षा १ देखि ५ सम्मको निरन्तर मूल्याङ्कन प्रणालीसम्बन्धी शिक्षकमा रहेका अन्योल हटाई गुणस्तरीय शिक्षण–सिकाइमा सकारात्मक योगदान पुग्ने विश्वास व्यक्त गर्नुभयो।

उहाँले तालिमबाट हासिल भएको ज्ञान र सीपलाई आफ्ना विद्यालयका अन्य शिक्षकहरूसँग पनि साझा गर्दै व्यवहारमा उतार्न सहभागी शिक्षकहरूलाई आग्रह गर्नुभयो।

तालिमको सहजीकरण रीड नेपालका शिक्षा विकास संयोजक तथा शिक्षा तालिम केन्द्र सुनसरीका रोस्टर प्रशिक्षक केशवदेव गिरी र जीवनज्योति माध्यमिक विद्यालय, नेलेका शिक्षक तथा रोस्टर प्रशिक्षक जनककुमार थापाले गर्नुभएको थियो।

प्रशिक्षक गिरीका अनुसार तालिममा एकीकृत पाठ्यक्रमको अवधारणा, पाठ्यक्रम कार्यान्वयनका चुनौती, एकीकृत शिक्षण योजना निर्माण, व्यवहारकुशल सीप विकास तथा कक्षा १–५ को मूल्याङ्कन प्रणाली लगायतका विषयमा प्रशिक्षण दिइएको थियो।

शिक्षा शाखाका नविन्द्र राईका अनुसार दुई दिनसम्म सञ्चालन भएको तालिममा गाउँपालिकाका वडा नं. १, २, ३, ६, ७ र ८ का विद्यालयबाट २६ जना शिक्षक सहभागी भएका थिए।

गाउँपालिकाले यस्ता तालिममार्फत शिक्षकको पेशागत क्षमता अभिवृद्धि गर्दै विद्यालय शिक्षाको गुणस्तर सुधारमा थप टेवा पुग्ने अपेक्षा गरेको जनाएको छ।