शून्य समय सरकारका लागि बेवास्ता गर्ने समय बन्यो, सोलुखुम्बुका जनता फोन गर्न डाँडा चढ्न बाध्य : सांसद कार्की

सबिना राई, असार १८, सोलुखुम्बु । प्रतिनिधि सभा सदस्य प्रकाश सिंह कार्कीले सोलुखुम्बु जिल्लाको विद्युत् र सञ्चार समस्या समाधानका लागि संसद्मार्फत सरकारको गम्भीर ध्यानाकर्षण गराउनुभएको छ। प्रतिनिधि सभाको शून्य समयमा बोल्दै सांसद कार्कीले संसद्को ’शून्य समय’ लाई सरकारले बेवास्ता गर्ने समयका रूपमा लिएको भन्दै आक्रोश व्यक्त गर्नुभयो।

विगतमा पनि आफूले सोलुखुम्बुको बिजुली र सञ्चार समस्याबारे सदनको ध्यान खिचेको स्मरण गराउँदै उहाँले हालसम्म पनि समस्या समाधान नभएकोमा आपत्ति जनाउनुभयो। “आज २१औँ शताब्दीमा आइपुग्दा पनि सगरमाथाको काखमा बस्ने नागरिकहरू फोन गर्नका लागि डाँडा चढ्न बाध्य छन्। यो नेपालका लागि लज्जाको विषय हो,“ उहाँले भन्नुभयो। पर्यटनका माध्यमबाट सोलुखुम्बुले देशलाई अर्बौँ रूपैयाँ राजस्व दिएर संसारभर चिनाएको भए पनि सिंहदरबारले सोलुखुम्बुलाई केवल राजस्व उठाउने जिल्लाका रूपमा मात्र हेरेको उहाँको आरोप छ।

सरकारले सोलुखुम्बुलाई सेवा दिने जिल्लाका रूपमा व्यवहार नगरेको भन्दै उहाँले प्रश्न गर्नुभयो, “एउटै विषयमा कति पटक बोल्नुपर्ने, कति पटक गुहा¥यो भने समस्या समाधान हुन्छ? जनताको आवाज बनेर म जति पटक पनि बोल्न तयार छु।“ सभामुखमार्फत सरकारको खोजी गर्दै सांसद कार्कीले देशलाई अर्बौँ राजस्व बुझाउने जिल्लाका जनताले न्यूनतम आधारभूत सेवासमेत नपाउनु दुखद् रहेको बताउनुभयो। उहाँले यस विषयलाई हल्का रूपमा नलिन र सोलुखुम्बुका जनताको आधारभूत समस्या तत्काल समाधान गर्न सरकारसँग जोडदार माग गर्नुभएको छ ।