देउसामा एक महिने वेटर/ वेट्रेस तालिम सम्पन्न, सामाजिक विकासमा जोड

असार २२, सोलुखुम्बु । सोलुखुम्बुको थुलुङ दुधकोशी गाउँपालिका–७ देउसामा एक महिने वेटर/वेट्रेस विषयक तालिम सम्पन्न भएको छ । देउसा क्षेत्रमा सञ्चालित होटल तथा पर्यटन व्यवसायसँग आबद्ध जनशक्तिलाई लक्षित गरी सञ्चालन गरिएको उक्त तालिममा स्थानीय होटललाई अनिवार्य सहभागिताको व्यवस्था गरिएको थियो ।

तालिम समापन कार्यक्रममा वडा अध्यक्ष भोजराज कार्कीले समयको मागअनुसार काम गर्न सक्ने दक्ष जनशक्ति उत्पादन गर्नु स्थानीय सरकारको महत्वपूर्ण दायित्व भएको बताउनुभयो। उहाँले पूर्वाधार विकाससँगै सामाजिक विकासलाई समान रूपमा प्राथमिकता दिन आवश्यक रहेको उल्लेख गर्नुभयो । वडा अध्यक्ष कार्कीले भवन निर्माण, सडक विस्तार वा अन्य भौतिक पूर्वाधार विकास मात्र विकासको मापदण्ड नभएको उल्लेख गर्दै चेतनाको विकास, सीप अभिवृद्धि र योग्य नागरिक निर्माण सामाजिक विकासका महत्वपूर्ण पक्ष भएको बताउनुभयो। सामाजिक विकासमा गरिएको लगानीको प्रतिफल तत्काल प्राप्त नहुने भएकाले धेरैजसो अवस्थामा यस क्षेत्रलाई अपेक्षित प्राथमिकता नदिइने गरेको उल्लेख गर्दै उहाँले यस्तो प्रवृत्ति दुःखद भएको धारणा राख्नुभयो।

उहाँले वडाको माग तथा निवेदन स्वीकृत गरी तालिम सञ्चालनका लागि आर्थिक सहयोग उपलब्ध गराएको व्यवसायिक तथा सीप विकास तालिम केन्द्र, ओखलढुंगाप्रति आभार व्यक्त गर्नुभयो। साथै तालिम सञ्चालनमा प्राविधिक सहयोग पु¥याएको मेची पोलिटेक्निकल इन्स्टिच्युट प्रा.लि.प्रति पनि धन्यवाद ज्ञापन गर्नुभयो। स्थानीय स्तरमा सेवा क्षेत्रका लागि आवश्यक दक्ष जनशक्ति उत्पादन गर्ने उद्देश्यका साथ सञ्चालन गरिएको उक्त तालिमले होटल तथा पर्यटन व्यवसायको सेवा गुणस्तर अभिवृद्धि हुनुका साथै स्थानीय युवाहरूको रोजगारी र स्वरोजगार प्रवद्र्धनमा समेत टेवा पुग्ने अपेक्षा गरिएको छ।