सोलुखुम्बुमा ५ दिन राहदानी सेवा बन्द हुने, नयाँ प्रणाली लागू गरिँदै

असार २२, सोलुखुम्बु । राहदानी विभागले राहदानी वितरण प्रणालीलाई थप आधुनिक, सुरक्षित र प्रभावकारी बनाउने उद्देश्यले नयाँ राहदानी प्रणाली लागू गर्न लागेकाले सोलुखुम्बुसहित देशभर केही दिन राहदानी सेवा प्रभावित हुने भएको छ। राहदानी विभागले असार १९ गते जारी गरेको सूचनाअनुसार नयाँ प्रणाली कार्यान्वयनको तयारीस्वरूप पुरानो प्रणालीमा रहेका आवेदनहरूको प्रक्रिया सम्पन्न गरी नयाँ प्रणालीमा स्थानान्तरण गर्नुपर्ने भएकाले असार २३ देखि २६ गतेसम्म जिल्ला प्रशासन कार्यालय, इलाका प्रशासन कार्यालय तथा विदेशस्थित नेपाली नियोगहरूबाट नयाँ राहदानी आवेदन संकलन गरिने छैन।

यस अवधिमा पुरानो प्रणालीमा रहेका आवेदनहरूको विवरण दर्ता, स्थानीय तहबाट प्रमाणीकरण, राहदानी जारी गर्ने, अस्वीकृत भएका आवेदन पुनः पेश गर्ने तथा पुनः स्थानीय प्रमाणीकरण गर्ने लगायतका कार्य सम्पन्न गरिने विभागले जनाएको छ। विभागका अनुसार नयाँ राहदानी प्रणाली २०८३ असार २९ गतेदेखि देशभर सञ्चालनमा ल्याइनेछ। नयाँ प्रणाली लागू भएसँगै राहदानी सेवा थप सुरक्षित, छिटो र प्रभावकारी हुने अपेक्षा गरिएको छ।

यता, जिल्ला प्रशासन कार्यालय सोलुखुम्बुले पनि विभागको सूचनाअनुसार राहदानी सेवा केही दिन प्रभावित हुने जानकारी गराएको छ। सहायक प्रमुख जिल्ला अधिकारी देवेन्द्र सुवेदीका अनुसार विभागको कार्यतालिकाअनुरूप सोलुखुम्बुमा पनि ५ दिन राहदानी सेवा बन्द रहनेछ। सेवा प्रभावित हुने अवधिमा अत्यावश्यक काम भएका सेवाग्राहीलाई निर्धारित मितिपछि मात्र राहदानीसम्बन्धी सेवा लिन जिल्ला प्रशासन कार्यालयले अनुरोध गरेको छ ।