एलपी ग्यास अभाव र आधा सिलिन्डर वितरणबारे सांसद रिना उप्रेति केसीको सरकारको ध्यानाकर्षण

सबिना राई, असार २२, सोलुखुम्बु । प्रतिनिधि सभा सदस्य रिना उप्रेति केसीले बजारमा खाना पकाउने एलपी ग्यासको चरम अभाव र वितरण प्रणालीमा देखिएको बेथितिप्रति सरकारको गम्भीर ध्यानाकर्षण गराउनुभएको छ । प्रतिनिधिसभाको सोमबार बसेको बैठकमा बोल्दै उहाँले पर्याप्त मौज्दात उद्योगमा हुँदाहुँदै पनि उपभोक्ताले सहज रूपमा ग्यास नपाएको र आधा सिलिन्डर वितरणका कारण थप अन्योल सिर्जना भएको बताउनुभयो ।

उहाँले सरकारले यसअघि १४.२ केजी क्षमताको सिलिन्डर वितरण गर्दै आएकोमा गत चैतदेखि ७.१ केजीको आधा सिलिन्डर वितरण व्यवस्था लागू गरेपछि आम उपभोक्तामा ग्यासको परिमाणबारे शंका उत्पन्न भएको र आफूहरू ठगिएको महसुस गर्नुपरेको उल्लेख गर्नुभयो ।

सांसद केसीले पर्याप्त ग्यास मौज्दात हुँदाहुँदै पनि पूर्ण क्षमताको सिलिन्डर किन वितरण नगरिएको भन्ने प्रश्न उठाउँदै यो व्यवस्था कहिलेसम्म कायम रहने र यसको असर उपभोक्ताले कहिलेसम्म भोग्नुपर्ने हो भन्नेबारे सरकारसँग स्पष्ट जवाफ माग्नुभयो । उहाँले सभामुखमार्फत सरकारसँग तत्काल १४.२ केजी क्षमताकै पूर्ण ग्यास सिलिन्डर वितरणको व्यवस्था गर्न आग्रह गर्दै उपभोक्ताको समस्या समाधानका लागि आवश्यक कदम चाल्न सरकारको ध्यानाकर्षण गराउनुभयो ।