लिखुपिके गाउँपालिकाका पाँच योजनाका लागि संघ र प्रदेशबाट बजेट विनियोजन

सबिना राई, असार २४, सोलुखुम्बु । सोलुखुम्बुको लिखुपिके गाउँपालिकाका पाँच महत्त्वपूर्ण विकास योजनाका लागि संघ र प्रदेश सरकारबाट बजेट विनियोजन भएको छ । गाउँपालिकाले माग तथा सिफारिस गरेका योजनाहरू स्वीकृत भएपछि बजेट विनियोजन भएको हो । विनियोजित योजनाअनुसार वडा नम्बर ३ को वडा कार्यालय भवन निर्माणका लागि नेपाल सरकारको समपूरक अनुदान अन्तर्गत १ करोड ६० लाख बजेट छुट्याइएको छ ।

यस योजनामा गाउँपालिकाले २० प्रतिशत साझेदारीस्वरूप ३२ लाख व्यहोर्ने जनाएको छ । त्यसैगरी, किम्ना–तामाखुरा सडक निर्माणका लागि ७ करोड बजेट विनियोजन भएको छ । यसमा गाउँपालिकाको २० प्रतिशत साझेदारी १ करोड ४० लाख रहने उल्लेख गरिएको छ । शिक्षा क्षेत्रअन्तर्गत डिजिटल मैत्री विद्यालय कार्यक्रमका लागि २ करोड ५५ लाख तथा डिजिटल मैत्री शिक्षाका लागि प्रविधि खरिद गर्न ८० लाख बजेट छुट्याइएको छ । यस्तै, पर्यटन प्रवद्र्धनतर्फ पैदल पर्यटन प्रवद्र्धन कार्यक्रमका लागि ८० लाख बजेट विनियोजन गरिएको छ । यस योजनामा गाउँपालिकाले २० प्रतिशत साझेदारीस्वरूप १६ लाख व्यहोर्नेछ ।

गाउँपालिकाका अनुसार यी योजनाले पूर्वाधार विकास, शिक्षा क्षेत्रको आधुनिकीकरण तथा पर्यटन प्रवद्र्धनमा उल्लेखनीय योगदान पुर्याउने विश्वास गरिएको छ । समपूरक तथा साझेदारी योजनाको प्रभावकारी कार्यान्वयनका लागि गाउँपालिकाले कुल १ करोड ८८ लाख साझेदारी रकम व्यवस्थापन गर्ने प्रतिबद्धता जनाएको छ । गाउँपालिकाले बजेट विनियोजनका लागि सहयोग गर्ने नेपाल सरकार, प्रदेश सरकार, जनप्रतिनिधि, सांसद तथा सम्बन्धित सबै पक्षप्रति आभार व्यक्त गर्दै योजनाहरू समयमै सम्पन्न गरी नागरिकलाई प्रत्यक्ष लाभ पुर्याउने लक्ष्य रहेको जनाएको छ ।