सबिना राई, असार २४, सोलुखुम्बु । हिमाली जिल्ला सोलुखुम्बुमा सञ्चालन गरिएको माध्यमिक शिक्षा परीक्षा (एसइई) ग्रेडवृद्धि (पूरक/मौका) परीक्षाको नतिजामा ११० जना विद्यार्थी उत्तीर्ण भएका छन् । शिक्षा विकास तथा समन्वय इकाई, सोलुखुम्बुका प्रमुख पुण्यराज डंगोलका अनुसार परीक्षामा सहभागी १२१ जना परीक्षार्थीमध्ये ११० जना उत्तीर्ण भएका छन् भने ११ जनाको ननग्रेड आएको छ । यसअनुसार कुल सहभागीमध्ये ९०.९० प्रतिशत विद्यार्थी उत्तीर्ण भएका हुन् ।
उत्तीर्ण विद्यार्थीमध्ये ५ जनाले ३.२० देखि ३.६० सम्म जीपीए प्राप्त गरेका छन्। त्यस्तै, ५१ जनाले २.८० देखि ३.२० जीपीए र ५४ जनाले २.४० देखि २.८० जीपीए हासिल गर्दै परीक्षा उत्तीर्ण गरेका छन्। ग्रेडवृद्धि (पूरक) परीक्षा असार १ गतेदेखि ९ गतेसम्म सञ्चालन गरिएको थियो। परीक्षा सम्पन्न भएको १४ दिनमै नतिजा सार्वजनिक गरिएको शिक्षा विकास तथा समन्वय इकाईले जनाएको छ ।
यसअघि नियमित एसइईको नतिजा पनि वैशाख महिनामै, करिब एक महिनाभित्र प्रकाशित गरिएको थियो । पछिल्लो समय सरकारले नतिजा प्रकाशन प्रक्रियालाई छिटो बनाउन निर्देशन दिएपछि सम्बन्धित निकायले निर्धारित समयमै नतिजा सार्वजनिक गर्दै आएका छन्। यसैबीच, नतिजाप्रति चित्त नबुझेका परीक्षार्थीले पुनर्योगका लागि अनलाइनमार्फत आवेदन दिन सक्ने व्यवस्था गरिएको छ। बोर्डको आधिकारिक वेबसाइटमा गई सम्बन्धित विषयको पुनर्योग फाराम भरेर आवेदन दिन सकिने बोर्डले जनाएको छ ।
Discussion about this post