२.२ अर्ब युआन घुसकाण्ड : चीनका पूर्वअधिकारी याङ योउलिनलाई मृत्युदण्ड

असार २४, सोलुखुम्बु । चीनको एक अदालतले करिब २।२ अर्ब युआन (करिब ३२५ मिलियन अमेरिकी डलर) बराबर घुस लिएको अभियोगमा नान्जिङका पूर्वसरकारी अधिकारी याङ योउलिनलाई मृत्युदण्डको सजाय सुनाएको छ। ६९ वर्षीय याङले सन् १९९३ देखि २०२३ सम्म नान्जिङ शहरमा विभिन्न सरकारी पदमा कार्यरत रहँदा इन्जिनियरिङ ठेक्का, जग्गा हस्तान्तरण तथा वित्तीय सुविधा उपलब्ध गराइदिने नाममा ठूलो रकम र बहुमूल्य वस्तु घुस लिएको अदालतले ठहर गरेको हो।

भ्रष्टाचारसँगै याङमाथि सरकारी सम्पत्ति हिनामिना, अधिकारको दुरुपयोग तथा सम्पत्ति शुद्धीकरण (मनी लन्डरिङ) सम्बन्धी आरोप पनि प्रमाणित भएको अदालतले जनाएको छ। जियाङ्सु प्रान्तको छाङझोउ अदालतले याङका अपराध अत्यन्त गम्भीर रहेको, जसका कारण राज्य र जनताको हितमा ठूलो क्षति पुगेको उल्लेख गर्दै मृत्युदण्डको फैसला सुनाएको हो।

याङविरुद्धको अनुसन्धान राष्ट्रपति शी जिनपिङले सञ्चालन गर्दै आएको व्यापक भ्रष्टाचारविरोधी अभियानअन्तर्गत गरिएको थियो। पछिल्ला वर्षहरूमा उक्त अभियानले उच्च सरकारी अधिकारी, सैन्य नेतृत्व तथा बैंकिङ क्षेत्रका प्रभावशाली व्यक्तिहरूमाथि पनि कडा कारबाही गर्दै आएको छ। अनुसन्धानका क्रममा याङले दोष स्वीकार गर्दै अधिकारीहरूलाई सहयोग गरेका थिए। उनले अन्तिम बयानमा आफ्नो कार्यप्रति पश्चातापसमेत व्यक्त गरेका थिए।

तर अदालतले उनको सहयोग अपराधको गम्भीरताका तुलनामा पर्याप्त नरहेको निष्कर्ष निकाल्दै सजायमा कुनै सहुलियत नदिएको जनाएको छ। चीनमा आर्थिक अपराधमा मृत्युदण्डको सजाय दुर्लभ मानिए पनि अत्यधिक रकमको भ्रष्टाचार भएका घटनामा यस्तो सजाय दिने गरिएको छ। यसअघि सन् २०२१ मा पूर्ववित्तीय अधिकारी लाइ सियाओमिनलाई १.८ अर्ब युआन घुस लिएको अभियोगमा मृत्युदण्ड दिइएको थियो। त्यसैगरी, सन् २०२४ मा भित्री मंगोलियाका पूर्वअधिकारी ली जियानपिङलाई ३ अर्ब युआनभन्दा बढी भ्रष्टाचार गरेको अभियोगमा मृत्युदण्ड कार्यान्वयन गरिएको थियो।