ताप्ली गाउँपालिकाद्वारा दलित समुदाय लक्षित कार्यक्रम, अन्तरजातीय दम्पती र ज्येष्ठ नागरिक सम्मान

ठविन्द्र मगर, असार २५,उदयपुर । उदयपुरको ताप्ली गाउँपालिकाले दलित समुदायको आर्थिक तथा सामाजिक सशक्तीकरणलाई लक्षित गर्दै यान्त्रीकरणसम्बन्धी सामग्री वितरण तथा ज्येष्ठ नागरिक र अन्तरजातीय विवाह गरेका दम्पतीलाई सम्मान गरेको छ। बुधबार आयोजित कार्यक्रममा गाउँपालिका अध्यक्ष ढुङ्गराज विश्वकर्माको अध्यक्षता तथा जिल्ला समन्वय समिति उदयपुरका उपाध्यक्ष तेजप्रसाद गिरीको प्रमुख आतिथ्य रहेको थियो।

कार्यक्रममा गाउँपालिका क्षेत्रभित्रका अन्तरजातीय विवाह गरेका दम्पतीलाई नगद, सम्मानपत्र तथा दोसल्ला प्रदान गरी सम्मान गरिएको गाउँपालिकाले जनाएको छ। यस्तै, सामाजिक सुरक्षा भत्ता प्राप्त गरिरहेका ज्येष्ठ नागरिकलाई लठ्ठी र सम्मानपत्र प्रदान गरिएको थियो। दलित समुदायको परम्परागत पेसालाई आधुनिक र व्यवस्थित बनाउने उद्देश्यले यान्त्रीकरण पञ्चेबाजा सामग्री, आरन व्यवसायका लागि आधुनिक औजार, सिलाइ–कटिङ मेसिन तथा आलु चिप्स उत्पादनका लागि आधुनिक उपकरणसमेत वितरण गरिएको गाउँपालिकाले जनाएको छ।

गाउँपालिका अध्यक्ष विश्वकर्माले संघीय सरकारको कानुनी व्यवस्था तथा स्थानीय तहको अधिकार क्षेत्रभित्र रही दलितसम्बन्धी ऐन र कार्यविधि निर्माण गरी सोहीअनुसार विभिन्न उत्थानमुखी कार्यक्रम सञ्चालन गर्दै आएको बताए। उनका अनुसार संघ, प्रदेश र स्थानीय तहबाट विनियोजित बजेटमार्फत दलित समुदायका विपन्न परिवारलाई सीपमूलक तथा उद्यमशीलता तालिम, व्यवसाय प्रवर्द्धन, यान्त्रीकरण उपकरण सहयोगलगायतका कार्यक्रम निरन्तर सञ्चालन भइरहेका छन्। गाउँपालिकाले यस्ता कार्यक्रमले दलित समुदायको आर्थिक आत्मनिर्भरता अभिवृद्धि गर्नुका साथै सामाजिक समावेशीकरण र सम्मानको संस्कृतिलाई थप मजबुत बनाउने विश्वास व्यक्त गरेको छ।