खोटाङ, साउन २५ । खोटाङको केपिलासगढी गाउँपालिकाले आर्थिक वर्ष २०८२÷८३ मा विनियोजित पुँजीगत बजेट ७२ प्रतिशत कार्यान्वयन गरेको छ । गाउँपालिकाले सार्वजनिक गरेको आय–व्यय विवरणअनुसार ५१ करोड ७० लाख ९४ हजार १ सय ६१ रुपैयाँ अनुमानीत आयको बजेट ल्याएकोमा गाउँपालिकाले त्यसको करिव ३ प्रतिशत कम ५० करोड १७ लाख १३ हजार ९ सय ४६ रुपैयाँ आम्दानी गरेको छ ।
गाउँपालिकाले उक्त बजेट मध्ये चालु आर्थिक वर्षमा ४० करोड ५० लाख ७ हजार ९ सय १ रुपैयाँ बजेट चालु तथा पुँजीगत दुबै तर्फ कार्यान्वयन गर्न सफल भएको छ । गाउँपालिकाका प्रमुख प्रशासकीय अधिकृत सौ धन राई द्वारा सार्वजनिक विवरणअनुसार चालु खर्चतर्फ ३३ करोड ८५ लाख लाख २० हजार २ सय ७३ रुपैयाँ विनियोजन गरिएकोमा २७ करोड ५९ लाख ८४ हजार ६४५ रुपैयाँ खर्च भएको छ । यो ८१.५३ प्रतिशत प्रगति हो ।
यस्तै विकास निर्माणसँग सम्बन्धित बजेट पूँजीगततर्फ १७ करोड ८५ लाख ७३ हजार ८८८ रुपैयाँ बजेटमध्ये १२ करोड ९० लाख २३ हजार २५६ रुपैयाँ खर्च भएको छ, जुन ७२.२५ प्रतिशत हो । चालु खर्चको तुलनामा पूँजीगत खर्च केही कम रहे पनि गाउँपालिकाले अधिकांश विकास कार्यक्रम कार्यान्वयन गरेको देखिएको छ । यद्यपि ठेकेदार कम्पनीहरूको ढिलासुस्ती र अटेरीपनका कारण केही योजनाहरु अलपत्र हुँदा आशादित रुपमा पुँजीगत खर्च हुन नसकेको गाउँपालिकाका प्रमुख प्रशासकीय अधिकृत राईले बताउनुभयो ।
गाउँपालिकाले आर्थिक कार्यविधि तथा वित्तीय उत्तरदायित्व नियमावली, २०७७ अनुसार आर्थिक वर्ष समाप्त भएको एक साताभित्र आय–व्यय विवरण सार्वजनिक गरेको हो। यसले वित्तीय पारदर्शिताप्रति गाउँपालिकाको प्रतिबद्धता देखाएको छ । यद्यपि आगामी वर्षमा विशेषगरी पूँजीगत बजेटको कार्यान्वयन दर अझै बढाउँदै विकास निर्माणका योजनालाई समयमै सम्पन्न गर्नुपर्ने चुनौती भने कायमै रहेको देखिन्छ । बजेट कार्यान्वयनमा भएको प्रगतिलाई निरन्तरता दिँदै विकास खर्चलाई थप प्रभावकारी बनाउनु गाउँपालिकाका लागि आगामी प्राथमिकता हुने अपेक्षा गरिएको छ ।
Discussion about this post