सम्पत्ति विवरण बुझाउन लिखुपिकेको ताकेता

सोलुखुम्बु, साउन २६ । सोलुखुम्बुको लिखुपिके गाउँपालिकाले गाउँपालिकामा कार्यरत जनप्रतिनिधि तथा कर्मचारीलाई आर्थिक वर्ष २०८२÷८३ को सम्पत्ति विवरण अनिवार्य रूपमा पेश गर्न ताकेता गरेको छ ।

गाउँपालिकाले असार २६ गते जारी गरेको सूचनामार्फत भ्रष्टाचार निवारण ऐन, २०५९, अख्तियार दुरुपयोग अनुसन्धान आयोग ऐन, २०४८, निजामती सेवा नियमावली, २०५० तथा स्थानीय सरकारी सेवा (गठन तथा सञ्चालन) ऐन, २०८० अनुसार सार्वजनिक पद धारण गरेका पदाधिकारी र कर्मचारीले प्रत्येक आर्थिक वर्ष समाप्त भएको मितिले ६० दिनभित्र सम्पत्ति विवरण बुझाउनुपर्ने कानुनी व्यवस्था रहेको स्मरण गराएको हो ।

सूचनामा यसअघि सम्बन्धित निकायमा सम्पत्ति विवरण पेश गर्ने प्रचलन रहे पनि आगामी दिनदेखि गाउँपालिकाका सबै जनप्रतिनिधि तथा कर्मचारीले श्रावण मसान्तभित्र गाउँपालिकाको प्रशासन शाखामा अनिवार्य रूपमा सम्पत्ति विवरण पेश गर्नुपर्ने उल्लेख गरिएको छ । गाउँपालिकाका अनुसार सम्पत्ति विवरण फाराम गाउँपालिकाको वेबसाइटबाट डाउनलोड गर्न सकिने व्यवस्था गरिएको छ।

साथै, विवरण बुझाउँदा आवश्यक व्यक्तिगत विवरण, सेवा समूह, श्रेणी, कार्यरत कार्यालय, सम्पर्क नम्बर तथा अन्य आवश्यक विवरणसमेत स्पष्ट रूपमा उल्लेख गर्नुपर्ने जनाइएको छ । गाउँपालिकाले कानुनी व्यवस्था कार्यान्वयन, सार्वजनिक पदाधिकारीको जवाफदेहिता तथा सुशासन प्रवद्र्धन गर्ने उद्देश्यले समयमै सम्पत्ति विवरण बुझाउन सबै सम्बन्धित पक्षलाई अनुरोध गरेको छ।