खोटाङमा हत्या प्रकरणः मुख्य अभियुक्तसहित तीन जना प्रहरी नियन्त्रणमा

असार २६, सोलुखुम्बु । खोटाङमा धारिलो हतियार खुकुरी प्रहार गरी एक जनाको हत्या गरेको अभियोगमा प्रहरीले तीन जनालाई पक्राउ गरेको छ । जिल्लाको दिप्रुङ चुइचुम्मा गाउँपालिका वडा नं. १ बस्ने ५७ वर्षीय तिल बहादुर सार्कीसहित तीन जनालाई प्रहरीले नियन्त्रणमा लिएको हो । जिल्ला प्रहरी कार्यालय खोटाङका अनुसार, असार २५ गते दिउँसो अन्दाजी १२ः०० बजेको समयमा सोही स्थान बस्ने ३८ वर्षीय ध्रुव भन्ने भक्त बहादुर अधिकारी मजदुरी गरेको पैसा माग्न भनी तिल बहादुर सार्कीको घरमा गएका थिए ।

सोही क्रममा सामान्य विवाद हुँदा तिल बहादुर सार्की समेतले अधिकारीमाथि धारिलो हतियार खुकुरी प्रहार गरेका थिए । खुकुरी प्रहारबाट अधिकारीको टाउको लगायत शरीरका विभिन्न भागमा गम्भीर चोट लागी घटनास्थलमै मृत्यु भएको प्रहरीले जनाएको छ । घटना लगतै जिल्ला प्रहरी कार्यालयबाट खटिएको विशेष प्रहरी टोलीले हत्यामा संलग्न मुख्य अभियुक्त तिल बहादुर सार्कीलाई असार २५ गते नै नियन्त्रणमा लिएको थियो ।

घटनाको थप अनुसन्धानका क्रममा संलग्नता देखिएका सोही स्थानका ५२ वर्षीया भोटीमाया सार्की र २२ वर्षीया सिता सार्कीलाई असार २६ गते प्रहरीले पक्राउ गरेको छ । पक्राउ परेका तीनै जना विरुद्ध कर्तव्य ज्यान मुद्दामा आवश्यक कानूनी कारबाहीका लागि म्याद थप गरी थप अनुसन्धान भइरहेको सूचना अधिकारी एवं प्रहरी निरीक्षक निराजन बस्नेतले जानकारी दिनुभएको छ ।