सोलुका नयाँ सीडीओ मगरको पहिलो अनुगमन, साल्मे पहिरोबाट सडक आवागमन अवरुद्ध हुन नदिने प्रतिवद्धता 

असार २८, सोलुखुम्बु । सोलुखुम्बुको प्रवेशद्वारको दुःख भनेर चिनिने साल्मे पहिरोको अवस्थाको बारेमा जिल्ला प्रशासन कार्यालय र सडक सम्बन्धी तालुक निकाय सडक डिभिजन हर्कपुरले संयुक्त अनुगमन गरेका छन् ।  

निरन्तरको वर्षातका कारण सिद्धिचरण राजमार्ग अन्तर्गत सोलुखुम्बुको तिङ्लामा पर्ने साल्मे पहिरो र आसपासको सडक अवस्थाको अनुगमन जिल्ला प्रशासन कार्यालयका प्रमुख जिल्ला अधिकारी कमानसिंह थापा मगर सहित सडक डिभिजन हर्कपुरले संयुक्त अनुगमन गरेका हुन् ।  सोलुखोला पुलको केही मिटर आसपासको सडकमा नदि कटानका कारण पहिरो गएपछि प्राप्त गुनासोको व्यवस्थापन गर्न पुगेको अनुगमन टोलीले सडक अवरुद्ध हुन नदिन सबैखाले काम गरिने प्रतिवद्धता व्यक्त गरेको छ ।  

जिल्ला प्रशासन कार्यालयका प्रमुख जिल्ला अधिकारी मगरले सडकको अवस्था चिन्ताजनक रहेको उल्लेख गर्दै सडक डिभिजन हर्कपुरसँगको सहकार्यमा सडक अवरुद्ध हुन नदिने गरि संयन्त्र सञ्चालन गरिने बताउनुभयो ।

यस्तै सडक डिभिजन हर्कपुरका सिनियर डिभिजनल इन्जिनियर सविन जोशीले सडक सञ्चालनका लागी कार्यालयले नियमित रुपमा रिपोर्टिङ र मर्मतको काम गरिरहेको उल्लेख गर्नुभएको थियो ।  अनुगमनका क्रममा जिल्ला प्रहरी कार्यालय सोलुखुम्बुका डीएसपी नवीन राजा बुढाथोकी सहितको सरकारी टोली सम्मीलित थियो ।